Նոյեմբերի 22-ին, Ախալքալաքի մունիցիպալիտետի սակրեբուլոն նիստի ընթացքում քննարկել է 2024 թվականի բյուջեի նախագիծը։ Պատգամավորները նախագիծը վերադարձրել են Ախալքալաքի քաղաքապետարան՝ լրամշակման՝ անելով առաջարկներ։
Ախալքալաքի մունիցիպալիտետի սակրեբուլոյի լիագումար նիստում քաղաքապետարանի աշխատակիցները պատգամավորներին ներկայացրել են բյուջեի նախագիծը և պատասխանել նրանց հարցերին։ Սա սակրեբուլոյում հաջորդ տարվա բյուջեի նախագծի առաջին քննարկումն է։ Պատգամավորներին հետաքրքրում էին եկամուտները, տրանսֆերտները, թե բյուջեից ուր է ուղղվում այս կամ այն գումարը։ Արդյունքում՝ հանձնաժողովները քաղաքապետարանին ներկայացրել են առաջարկներ մի քանի հարցերի վերաբերյալ, որոնց առնչությամբ առաջարկներ են արվել նոյեմբերի 21-ին, հանձնաժողովների և բյուրոյի նիստերում։
Առաջարկների մեծ մասը վերաբերում է սոցիալական ծառայության ծախսերին։
Քաղաքապետարանի հանձնաժողովների առաջարկները հետևյալն են.
– բարձրացնել նորածիններին տրվող միանվագ գումարի չափը
– մտցնել մեկանգամյա պարգևատրում գերազանց ակադեմիական առաջադիմություն ունեցող աշակերտների համար
– վերացնել միայնակ ծնողների համար բարձրագույն կրթության վճարների համաֆինանսավորման տարիքային շեմը
– առանձին կոդով մուտքագրել «գենդերային իրադարձություններ» կետը
– ֆինանսավորում հատկացնել գյուղերում ցուցանշանների տեղադրման համար:
Պատգամավորները քվեարկեցին Ախալքալաքի մունիցիպալիտետի 2024 թվականի բյուջեի նախագիծը լրամշակման վերադարձնելու օգտին։
