Վերջերս Ախալքալաքի մունիցիպալիտետի սակրեբուլոն հաստատել է քաղաքապետարանի կողմից վարչական տույժերի կիրառման ձևաթուղթը։ Jnews-ն ավելի մանրամասն ներկայացնում է, թե Ախալքալաքի մունիցիպալիտետում գործադիր իշխանությունը ինչի՞ համար կարող է տուգանել բնակիչներին։
Հողի զավթում
Պետական սեփականություն հանդիսացող հողամասի զավթումը և (կամ) հողի օգտագործումն առանց օգտագործման իրավունքի ենթադրում է տուգանք 1000-2000 լարիի չափով: Կրկնակի խախտման դեպքում կարող է հանգեցնել տուգանքի՝ 3000-ից 3500 լարիի չափով։ Մունիցիպալիտետին պատկանող հողամասի ինքնակամ զավթման և/կամ առանց հողի օգտագործման իրավունքի օգտագործման դեպքում անձը կստանա նախազգուշացում: Նույն արարքը կրկին կատարելու դեպքում անձը կտուգանվի 2000 լարիի չափով։
Աղմուկ
Բնակելի շենքում, մասնավոր անշարժ գույքում կամ պետական/մունիցիպալ հիմնարկի շենքում ցերեկային կամ գիշերային ժամերին ակուստիկ աղմուկի թույլատրելի չափորոշիչները գերազանցելու դեպքում ֆիզիկական կամ իրավաբանական անձը կստանա նախազգուշացում: Արարքը կատարելուց հետո մեկ տարվա ընթացքում օրենքը երկրորդ անգամ խախտելու դեպքում ֆիզիկական անձը կարող է տուգանվել 150 լարիով, իսկ իրավաբանական անձը ՝ 500 լարիով։ Ակուստիկ աղմուկը վերաբերում է ոչ միայն բարձր երաժշտությանը, այլև հրատեխնիկական արտադրանքի կիրառումից առաջացած աղմուկին: Երեկոյան ժամը 23:00-ից մինչև առավոտյան 08:00-ն ընկած ժամանակահատվածում աղմուկ բարձրացնելը հանդիսանում է իրավախախտում: Սույն հոդվածի դրույթները չեն տարածվում ավիացիայի, երկաթուղու, ճանապարհային և ծովային ենթակառուցվածքների վրա: Շինարարական և վերանորոգման աշխատանքները պետք է իրականացվեն ցերեկային ժամերին, իսկ տոն օրերին կամ մարզական միջոցառումների ժամանակ բարձրացված աղմուկը պետք է համաձայնեցվի համապատասխան մունիցիպալ մարմնի հետ:
Շներ և կատուներ
Շուն և կատու պահելու կանոնները խախտելը հանգեցնում է տուգանքի՝ նվազագույն աշխատավարձի մինչև մեկ հինգերորդի չափով, իսկ պաշտոնատար անձի դեպքում՝ նվազագույն աշխատավարձի մինչև կեսի չափով։ Վարչական իրավախախտումը 1 տարվա ընթացքում կրկնելն առաջացնում է տուգանք շան/կատվի տիրոջ նկատմամբ՝ 50 լարիի չափով։ Հասարակական վայրերում, այդ թվում՝ բուլվարում, զբոսայգում, հրապարակում (բացառությամբ դրա համար հատուկ հատկացված վայրերի) առանց դնչկալի կամ վզաթոկի շան հետ զբոսնելու համար շան տերը տուգանվում է 150 լարիի չափով։ Վարչական իրավախախտումը 1 տարվա ընթացքում կրկնելու դեպքում՝ շան տիրոջը կտուգանեն 300 լարիի չափով։
Ճանապարհներ
Շինարարական կամ այլ նյութերի փոխադրումն անսարք մագիստրալ կամ կցորդային սարքավորումներով տրանսպորտային միջոցով, որը ստեղծում է ճանապարհի մակերևույթի աղտոտման կամ վնասման վտանգ, ենթադրում է տուգանք 300 լարիի չափով։ Սույն արարքը կրկնելը կառաջացնի տուգանք 900 լարիի չափով։ Մունիցիպալիտետի վարչական սահմաններում թույլտվության պայմանների խախտմամբ կանոնավոր ուղևորափոխադրումներ իրականացնելն առաջացնում է տուգանք 100 լարիի չափով։
Շինարարություն
Ճանապարհի, ճանապարհային կառույցի, ստորգետնյա հաղորդակցության կամ երկաթուղային անցման շինարարական և վերակառուցման աշխատանքներ կատարելը կամ տրանսպորտային միջոցը ճանապարհին տեղակայելը` առանց տեղական ինքնակառավարման մարմինների հետ համաձայնեցման, ֆիզիկական անձի համար ենթադրում է տուգանք 2000 լարիով, իսկ իրավաբանական անձի դեպքում՝ 5000 լարի: Արարքը կրկնելը ֆիզիկական անձի համար ենթադրում է 5000 լարի տուգանք, իսկ իրավաբանական անձի համար՝ 15 000 լարի։
Զբոսայգիներում, այգիներում, հրապարակներում, սիզամարգերում, բակերում, մարզահրապարակներում, ավտոկայանատեղիներում, շուկաներում կամ այլ վայրերում շինանյութեր և (կամ) կոնստրուկցիաներ տեղադրելը ֆիզիկական անձի համար առաջացնում է տուգանք՝ 200 լարիի չափով, իսկ իրավաբանական անձի, հիմնարկի, կազմակերպության համար՝ 1000 լարիի չափով։
Բնակելի կետերի բարեկարգման կանոնների խախտումը, ինչպես նաև բնակեցված վայրերում մաքրության և կարգուկանոնի ապահովման կանոնների չկատարումը, ձեռնարկություններին, հիմնարկներին, կազմակերպություններին կից և (կամ) հարակից տարածքին քամահրանքով վերաբերվելը ֆիզիկական անձի համար կենթադրի 200 լարի, իսկ իրավաբանական անձի, հիմնարկի, կազմակերպության համար՝ 1000 լարի տուգանք։ Նույն արարքը, կրկին կատարելն առաջացնում է տուգանք՝ ֆիզիկական անձի նկատմամբ՝ 1000 լարի, իսկ իրավաբանական անձի, հիմնարկի կամ կազմակերպության՝ 5000 լարիի չափով։
Աղտոտող նյութի առանց թաց եղանակով մշակումը (կտրում, հղկում, սղոցում, մանրացում և այլն), որը չի ապահովում փոշու վերացում, ֆիզիկական անձի համար ենթադրում է 500 լարի տուգանք, իսկ իրավաբանական անձի համար՝ 1000 լարի: Նույն արարքը կրկին կատարելու դեպքում ֆիզիկական անձը կտուգանվի 1000 լարիի չափով, իսկ իրավաբանական անձը՝ 2000 լարիի չափով:
Քաղաքապետարանը կարող է նաև տուգանք կիրառել շինհրապարակում չփաթեթավորված փոշային նյութը և (կամ) ոչ պատշաճ փաթեթավորված փոշային նյութն այնպես տեղադրելու համար, որ այն չի կանխում նյութից առաջացած մասնիկների մուտքը շրջակա միջավայր՝ ֆիզիկական անձը կտուգանվի 500 լարիով , իսկ իրավաբանական անձը՝ 2000 լարիով: Կրկնակի իրավախախտման դեպքում ֆիզիկական անձի համար նախատեսված է տուգանք 1000 լարիի չափով, իսկ իրավաբանական անձի համար՝ 4000 լարի:
Կենդանիների հետ զբոսանք
Ինքնակառավարման ներկայացուցչական մարմնի կողմից ինքնակառավարման վարչական սահմաններում սահմանված կանոնները խախտելը, մանր և (կամ) խոշոր անասուններին հսկողության տակ կամ առանց հսկողության պահելը, բացառությամբ գյուղատնտեսական նշանակության հողամասում, սեփականատիրոջ համար հանգեցնում է 50 լարի տուգանքի։ Բուլվարում, զբոսայգում, հրապարակում կամ լողափում մանր և խոշոր ընտանի կենդանիների հետ, հսկողության տակ կամ առանց հսկողության գտնվելը, մանր և խոշոր անասունների տիրոջ համար առաջացնում է տուգանք՝ 100 լարիի չափով։
Դժվարություններ․ Վարչական իրավախախտման վերաբերյալ արձանագրություն կազմելու իրավասություն ունեցող անձը պետք է անասունին տեղափոխի հատուկ տեղ և հոգ տանի նրա մասին մինչև սույն հոդվածով նախատեսված հանգամանքների առաջանալը: Անասունը տիրոջը կվերադարձվի միայն տուգանքի վճարումը հաստատող փաստաթուղթն ստանալուց հետո, կենդանու հատուկ վայր տեղափոխման և պահման ծախսերը ներկայացնելուց հետո։ Եթե իրավախախտը ժամանակին չի վճարում տուգանքը, ապա խոշոր եղջերավոր անասուններն իրացվում են Վրաստանի օրենսդրությամբ սահմանված կարգով՝ նրանց նկատմամբ նշանակված տուգանքի և անասունների պահման ծախսերի փոխհատուցումն ապահովելու համար։
Քաղաքի արտաքին տեսքին վնաս հասցնելը
Շենքերի ճակատների, ցուցափեղկերի, ցանկապատերի, սյուների, ծառերի և բույսերի վրա տարբեր տեսակի մակագրությունների, գծագրերի, խորհրդանիշների կամայական կատարումը, ինչպես նաև այդ նպատակով չնախատեսված վայրերում պաստառների, կարգախոսների, բաններների տեղադրումը, ցանկապատերը և շենքերը չներկված թողնելն առաջացնում է տուգանք 50 լարիի չափով։ Նույն արարքը, որը կրկին է կատարվել, առաջացնում է տուգանք 500 լարիի չափով։
Վարչական շենքերի ճակատներին, ինչպես նաև հարակից տարածքում, այդ թվում՝ հետիոտնային և տրանսպորտային միջոցների համար նախատեսված ճանապարհի վրա, տարբեր տեսակի մակագրությունների, գծագրերի, խորհրդանիշների չարտոնված կատարումը ենթադրում է տուգանք 500 լարիով։ Սույն հոդվածի կրկին անգամ խախտումը հանգեցնում է տուգանքի 1000 լարիի չափով կամ, եթե հաշվի առնելով դեպքի հանգամանքները և իրավախախտի ինքնությունը, այդ գումարի կիրառումը համարվում է անբավարար՝ ազատազրկում՝ մինչև 15 օր ժամկետով։
Սույն հոդվածի առաջին մասով նախատեսված արարքը, որը կատարվել է Վրաստանի «Մշակութային ժառանգության մասին» օրենքով սահմանված մշակութային ժառանգության պահպանության գոտում, հանգեցնում է 1000 լարիի չափով տուգանքի, կրկնակի խախտման դեպքում` 2000 լարի: Սույն հոդվածով նախատեսված տուգանքի նշանակման օրվանից 10-օրյա ժամկետում խախտումը չվերացնելն առաջացնում է տուգանքի ՝ 500 լարիի չափով։ Նշում. սույն հոդվածի մասով նախատեսված իրավախախտում կատարելու համար անձը զրկվում է զենք կրելու իրավունքից մինչև 3 տարի ժամկետով։
Բակերը, փողոցները և հրապարակներն ինքնակամ փորելը, դրանք շինանյութով լցնելը, առանց նախնական վիճակի բերելու փորված թողնելը ֆիզիկական անձի համար կենթադրի տուգանք՝ 200 լարիի, իսկ իրավաբանական անձի, հիմնարկի կամ կազմակերպության համար՝ 1000 լարիի չափով։ Նույն արարքը, որը կատարվել է Վրաստանի «Մշակութային ժառանգության մասին» օրենքով սահմանված մշակութային ժառանգության պահպանության գոտում, ֆիզիկական անձի համար ենթադրում է տուգանք 1000 լարիով, իրավաբանական անձի, հիմնարկի կամ կազմակերպության համար՝ 3000 լարիով։ Սույն հոդվածով նախատեսված խախտումը տուգանքի նշանակման օրվանից 10-օրյա ժամկետում չվերացնելը ենթադրում է 1000 լարի տուգանք ֆիզիկական անձի համար, իսկ իրավաբանական անձի, հիմնարկի կամ կազմակերպության համար՝ 3000 լարի տուգանք:
Մունիցիպալիտետի վարչական սահմաններում գտնվող տարածքի արտաքին տեսքի չարտոնված փոփոխությունը, այդ թվում՝ շենքերի գույնը փոխելը, կենթադրի տուգանք՝ 200 լարիի չափով։ Նույն արարքը, որը կատարվել է «Մշակութային ժառանգության մասին» Վրաստանի օրենքով սահմանված մշակութային ժառանգության պահպանության գոտում, առաջացնում է տուգանք 5000 լարիի չափով։ Օդափոխման համակարգի, բանկոմատի, հագուստի չորանոցի, բարերի, կրպակների, վաճառասեղանների և (կամ) այլ լուսային կառույցների չթույլատրված տեղադրումը և (կամ) տեղակայումը՝ 1000 լարի: Նույն արարքը, որը կատարվել է «Մշակութային ժառանգության մասին» Վրաստանի օրենքով սահմանված մշակութային ժառանգության պահպանության գոտում, կենթադրի տուգանք 5000 լարիի չափով:
Արտաքին գովազդ
Արտաքին գովազդի տեղադրման թույլտվության պայմանները խախտելը կենթադրի տուգանք՝ 300 լարիի չափով։ Առանց համապատասխան թույլտվության արտաքին գովազդի տեղադրումը կհանգեցնի 500 լարի տուգանքի և արտաքին գովազդի անօրինական կրիչի բռնագրավմանը։
Մոլախաղերի գովազդ
Ազարտային խաղերի, տոտալիզատորի, լոտոյի, բինգոյի, մոլախաղերի կազմակերպչի նշանները տարածելու և (կամ) տեղադրելու կանոնները խախտելն առաջացնում է տուգանք 10 000 լարիի չափով: Համաձայն Վրաստանի «Հեռուստատեսության և ռադիոյի հեռարձակման մասին» օրենքի լիցենզավորված/լիազորված հեռարձակողի ծրագրում մոլախաղերի, տոտալիզատորի, լոտո, բինգո, մոլախաղերի կազմակերպիչ, տոտալիզատոր, լոտոյի կազմակերպիչ և բինգո կազմակերպողի գովազդը/հովանավորությունը և (կամ) արտադրանքի (ապրանք /ծառայություն) ծրագրում տեղադրումը ենթադրում է 10 000 լարիի չափով տուգանք:
Հրատեխնիկա
Անչափահասներին հրատեխնիկական արտադրանքի վաճառքը ենթադրում է տուգանք ֆիզիկական անձի համար՝ 100 լարի, իսկ իրավաբանական անձի համար՝ 200 լարիի չափով։ Գիշերային ժամերին հրատեխնիկական արտադրանքի օգտագործումը ֆիզիկական անձի համար ենթադրում է տուգանք 150 լարիով, իսկ իրավաբանական անձի համար՝ 500 լարիով։ Սույն հոդվածի դրույթները չեն տարածվում ամանորյա տոների վրա (դեկտեմբերի 31-ից ժամը 21:00-ից մինչև հունվարի 2-ը ժամը 23:00-ն և հունվարի 13-ին ժամը 21:00-ից մինչև հունվարի 14-ը ժամը 23:00-ն), Վրաստանի անկախության վերականգնման մասին ակտի ընդունման օրը (Ապրիլի 9) և Վրաստանի անկախության օրը (Մայիսի 26):