Այսօր՝ հունիսի 4-ին, ժամը 15:00-ի սահմաններում Վաչիան գյուղում պտտահողմը (տորնադո) քանդել է գյուղի բազմաթիվ տների տանիքներ։
Վատ եղանակն Ախալքալաքի մունիցիպալիտետում տիրում է մեկ ամսից ավելի, հեղեղումները, կարկուտը հերթով վնաս են պատճառում շրջանի տարբեր գյուղերին։ Ահա և այսօր Ախալքալաքի մունիցիպալիտետի Վաչիան գյուղում ժամը 14:00-15:30-ն ընկած ժամանակահատվածում ուժգին կարկուտ ու քամի է սկսվել, որը վերածվել է տորնադոյի և տարել գյուղի բազմաթիվ տների տանիքներ։
Լյովա Ալեքյանի տան տանիքն ամբողջությամբ քշել է
«Ուժեղ քամի սկսվեց, փոթորիկ: Քամու ուժգնությունն այնպիսին էր, որ համարյա բոլորիս բարձրացրեց, նույնիսկ մենք կադրեր ունենք, տեսանկարահանել ենք»,- ասում է Վաչիան գյուղի բնակիչ Կալեփսի Ղազարյանը։
Գյուղի բնակիչները գնահատում են վնասը, որը վատ եղանակային պայմանների արդյունք է:
«Այդ ամենը տևեց ավելի քան մեկ ժամ: Տանիքները քշեց, դրանք օդում կտոր-կտոր սավառնում էին: Սկզբում քամին ուժեղ էր, հետո քամին գնաց հակառակ ուղղությամբ, սկսեց անձրև ու կարկուտ տեղալ: Առայժմ մենք հստակ չգիտենք, թե ովքեր են տուժել, բայց տուժել են գրեթե բոլորը՝ մոտ 20 տուն։ Քամին քիչ էր, հիմա էլ կարկուտը խափանեց լավ բերք ստանալու մեր ամբողջ հույսը: Տներ կան, որոնց տանիքները քամին ամբողջությամբ քշել է»,- ասում է Վաչիանի մեկ այլ բնակիչ։
Ղազարյանների տունը
Սկզբում մարդիկ մտածել են, որ հրդեհ է, քանի որ տորնադոն տարբեր իրերի հետ մեկտեղ օդ է բարձրացրել հողը և խիտ ծխի տպավորություն է ստեղծվել։
«Մենք հուղարկավորության էինք, տեսնենք կրակի նման մի բան է, մոտենալուն պես տեանք, սա ուրիշ բան է: Ավելի ու ավելի էր մոտենում՝ տանելով տանիքները: Ամեն ինչ երկայնքով ցաքուցրիվ էր անում: Մոտ 15-20 րոպե տևեց։ Ավելի վատացավ, երբ կարկուտը սկսվեց: Մարդկանց վերանորոգումը փչացավ անձրեւի ու կարկուտի պատճառով: Բերքի մասին խոսք անգամ չկա: Կարկուտն էլ ավելի երկար տեւեց»,- ասում է Սամվել Պալոյանը։
Հովսեփ Աղաջանյանի տունը
Վաչիանի բնակիչներն իրենց զգացին կարծես սարսափ ֆիլմում:
«Ասես քամի էր, ապա դա շատ մեղմ է ասված, դա տորնադո էր, ինչպես ֆիլմերում: Նման բան չէինք տեսել: Մարդկային զոհեր չունենք, բայց գյուղի տանիքները փլվել են: 20-ից ավելի տուն է վնասվել։ Մենք արդեն կապվել ենք Ախալքալաքի քաղաքապետարանի հետ, գալիս են գնահատելու վնասը։ Նրանք արդեն ճանապարհին են»,- ասաց Վաչիան գյուղում քաղաքապետի ներկայացուցիչ Ֆեդոր Թորոսյանը։
Քաղաքապետարանից ժամանեցին տարերային աղետի վայր:
«Անզեն աչքով տեսնում ենք, որ վնասը շատ մեծ է: Լավ է, որ մարդկային կուրուստներ չունենք, մենք շարունակելու ենք աշխատանքներ տանել: Տեսնենք, թե ինչ կլինի։ Մեր տեղեկություններով՝ 20 տուն վնասվել է, 7 տուն մեծ վնաս է կրել, մնացածը՝ մասամբ են վնասվել։ Ցավոք սրտի, մենք 100 տոկոս փոխհատուցման հնարավորություն չունենք, ինչով կկարողանանք կօգնենք»,- ասաց Ախալքալաքի քաղաքապետ Մելքոն Մակարյանը։
Ինչ վերաբերում է բերքի վնասին, ապա մունիցիապլիտետը չի կարող փոխհատուցել այն։ Մնացած վնասը գնահատելու համար կաշխատի հատուկ հանձնաժողով։
Այս պահին գյուղում հոսանք չկա, էլեկտրամատակարարումը կվերականգնվի կա՛մ այսօր շատ ուշ ժամի, կա՛մ վաղը։
