Մուրջախեթ գյուղի պատմական ժառանգություն հանդիսացող կամրջի պահպանման համար դեռ 2022 թվականի սեպտեմբերից սկսվել էին նոր կամրջի շինարարության աշխատանքները, շահագործման հանձնելու ժամկետը նոյեմբերի վերջն էր, սակայն եղանակային պայմանների պատճառով այն հետաձգվել էր: Հիմա արդեն աշխատանքները վերսկսելու համար սպասում են քաղաքապետարանի հրահանգին։
Ավտոմոբիլա-հետիոտնային կամրջի կառուցման նախագիծն իրականացվում է պետական միջոցներով՝ տեղական բյուջեի համաֆինանսավորմամբ։ Շինարարության տենդերը 584 350 լարիով շահել է «Մշեն+» ՍՊԸ-ը, որից 49 218 լարին ներդնում է մունիցիպալիտետը, իսկ 535 132 լարին՝ պետությունը։
Աշխատանքներն իրականացնող «Մշեն+» ընկերությունից Jnews-ին տեղեկացրեցին, որ նրանք սպասում են քաղաքապետարանի կողմից աշխատանքներն սկսելու ժամկետի մասին պատասխանին։
Ախալքալաքի քաղաքապետարանից տեղեկացանք, որ մայիս ամսին կգրեն աշխտանքներն վերսկսելու հրամանագիրը։
«Նրանց մնացել է միայն ասֆալտապատման աշխատանքները, և քանի-որ մեր մոտ ասֆալտի գործարան միայն «ՋավախԱվտոԳզա»-ն ունի, երբ գործարանն սկսեց աշխատել, ասֆալտ արտադրել, մենք գրությունը կգրենք, կուղարկենք և 15 օրվա մեջ այդ հարցը կլուծեն», – ասաց քաղաքապետ Մելքոն Մակարյանը։
Նոր կամուրջը հնից 1 մ-ով բարձր կլինի՝ 2,80 մ բարձրությամբ, 5 մ լայնությամբ: Կկառուցվի հետիոտների համար նախատեսված մայթ, երկու կողմից բետոնե ցանկապատ, կամուրջը կասֆալտապատվի, կմիանա հիմնական ճանապարհին։
Նշենք, որ նոր կամուրջը կառուցվում է հին կամրջի մոտ, որն արդեն քանդվում է։ Այն մշակութային ժառանգության հուշարձան է, դրա վերականգնման համար անհրաժեշտ է թույլտվություն, մեծ միջոցներ և շատ ժամանակ, ուստի տեղական իշխանությունները որոշել են նոր կամուրջ կառուցել, որպեսզի պատմական հուշարձանը վերջնականապես չփլվի։
