Սամցխե-Ջավախքի հասարակական կազմակերպությունները բաց նամակով դիմել են Սամցխե-Ջավախքի մեծամասնական պատգամավորներ Սամվել Մանուկյանին և Անտոն Օբոլաշվիլիին՝ խնդրելով չաջակցել «օտարերկրյա գործակալների մասին» օրենքի նախագծին, քանի որ այս օրենքը փաստացի փաստի առաջ է կանգնեցնում: Հասարակական կազմակերպություններն այլեւս չեն կարողանա օգնություն ցուցաբերել խոցելի խմբերին և ընդհանրապես նահանգապետարանի բնակչությանը:
Հասարակական կազմակերպությունների նամակը պատգամավորներին ներկայացնում ենք ստորև.
««Օտարերկրյա գործակալների» օրենսդրական փաթեթը կանխամտածված դիվերսիա է Վրաստանի եվրաինտեգրման ճանապարհին։ Կարծում ենք, որ այս օրենքի նպատակը անկախ լրատվամիջոցներին լռեցնելն ու քաղաքացիական կազմակերպությունների գործունեությունը դադարեցնելն է:
Առանց օտարերկրյա ֆինանսավորման մենք չէինք կարողանա փրկել մշակութային ժառանգության հուշարձանները, ճանապարհներ, դպրոցներ ու մանկապարտեզներ կառուցել: Մեծ է նաև դոնորների դերը գյուղատնտեսության, առողջապահության և պաշտպանության ոլորտներում, ուստի այս փաթեթեի ընդունումը մեծ վնաս կհասցնի Վրաստանում ապրող հարյուր հազարավոր մարդկանց, էլ ավելի կմեծացնի արտագաղթը։
Ռուսական Օրենքի ընդունումն ինքնաբերաբար կհանգեցնի Վրաստանից դոնոր կազմակերպությունների արտահոսքին, կսպանի քննադատական կարծիքը, ազատ խոսքն ու ժողովրդավարությունը երկրում:
Կոչ ենք անում Վրաստանի խորհրդարանում Սամցխե-Ջավախքից ընտրված մեծամասնական պատգամավորներին չաջակցել հակասահմանադրական օրինագծին, որը կխոչընդոտի Վրաստանին անդամակցելու ճանապարհին», – ասված է հայտարարության մեջ։