Օնլայն սովորելուց հետո ուսանողների մեծ մասը բողոքում էր այս ձևաչափով սովորելու մեթոդից: Պատճարաբանելով՝ օնլայն սովորել հնարավոր չէ: Բայց, ի տարբերություն շատերի կրթաթոշակ ստացած մեր հերոսը չի հասկանում թե ինչո՞ւ են շատ ուսանողներ այդպես մտածում: Էդիկ Կամալյանն ասում է՝ սովորելու համար պետք է ցանկություն լինի, ձևաչափն այս հարցում մեծ դեր չի խաղում:
Էդիկ Կամալյանը Մառնեուլի շրջանի Շահումյան գյուղից է, Իլիայի պետական համալսարանում քաղաքագիտություն է ուսանում: Նա այս տարի, ինչպես և նախորդ տարի, այն ուսանողների թվում է, ովքեր բարձր միավորներ հավաքելով հայտնվել են A-խմբում, և կրթաթոշակ են ստանում:
«Անցած կիսամյակ դեռ օնլայն էինք սովորում, բայց դա ինձ չխանգարեց լավ սովորել, բոլոր առարկաներից հավաքել եմ առավելագույն միավորներ: Այսինքն՝ հարյուրից հարյուր, բացի մեկ արռարկայից, որը 99բալ եմ ստացել: Միջինում հավաքելով 99,8 բալ, կարողացա հայտնվել կրթաթոշակ ստացող ուսանողների ցանկում: Ինչը կարծում եմ պարտավորեցնող է»:
Էդիկը մյուս տարի նույնպես հավակնում է համալրել այն ուսանողների շարքը, ովքեր կստանան կրթաթոշակ: Դասերից զատ մասնկացում է նաև տարբեր ծրագրերի և միջոցառումների, նաև Թբիլիսիի երիտասարդական կենտրոնի անդամ է:
«Երբ որոշում ենք սովորելու գնալ, նախ պետք է ճիշտ մասնագիտություն ընտրենք, որ հետո հաճույքով կարողանանք սովորել, ոչ թե ստիպողաբար: Ես ընտրեցի իմ ուզած մասնագիտությունը և այժմ համարյա ամբողջ ժամանակս տրամադրում եմ դասերին, ուզում եմ լավ մասնագետ դառնալ: Բոլորին խորհուրդ եմ տալիս սովորել, աշխատել, ձգտել և ցանկալի արդյունքը շատ սպասեցնել չի տա»:
2022 թվականի գարնանային կիսամյակի բալերի հիման վրա, Իլիայի պետական համալսարանում (მეცნიერებათა და ხელოვნების) 211 ուսանող կրթաթոշակ է ստացել, որը տրվում է միայն 96 և ավելի բալեր հավաքած ուսանողներին: Էդիկը վարկանշային աղուսյակի 6-րդ հորիզոնականում է, իսկ լավագույն տասնյակում միակ հայը:
Վրաստանի ԲՈՒՀ-երում կրթաթոշակ տրամադրում են առավելագույն միավորներ հավաքած ուսանողներին: Միավորներից բացի հաշվի է առնվում ևս մի քանի բախադրիչ, օրինակ՝ համալսարանը, որտեղ սովորում է ուսանողը և ֆակուլտետը: Նշենք նաև, որ նախատեսված անցողիկ շեմն, ըստ որի՝ կրթաթոշակ են հատկացնում, հաստատուն չէ:
Գրիշա Մկրտչյան
