Օրերս Թամար Թագուհու փողոցում՝ վրացական դպրոցի մոտ, երկու թափառող շների են գնդակահարել։ Ախալքալաքում թափառող շների խնդիրը դեռ արդիական է մնում: Քաղաքապետարանը չի շտապում լուծել այս հարցը՝ շներին բռնելու և ստերիլիզացնելու տենդերը դեռ չի հայտարարվել։ Բնակչությունը շարունակում է դժգոհել, որ վախի մեջ է ապրում։
Օգոստոսի 28-ին, ժամը 22.00-23.00-ի սահմաններում, Թամար Թագուհու փողոցի բնակիչները կրակոցներ են լսել, դուրս են եկել փողոց, տեսել են սատկած թափառող շանը, իսկ երկրորդը վիրավորված է եղել։ Առավոտյան արդեն ոչ առաջինը, ոչ էլ երկրորդը փողոցում չեն եղել։
«Մենք դուրս եկանք փողոց, քանի որ անհանգստացանք կրակոցներից, բայց ոչ անմիջապես: Այնտեղ սատկած շներ էին: Մենք չտեսանք, թե ով էր կրակել, ով է տարել շներին, մենք նույնպես չգիտենք: Մինչև կեսգիշեր շները այնտեղ էին, բայց վաղ առավոտյան շներն արդեն չկային: Չգիտենք՝ երբ են տարել: Կոնկրետ՝ այս շները մեր ընտանիքին չեն անհանգստացրել, մեզ ձեռք չեն տվել, քանի որ մեզ ճանաչում էին, բայց անծանոթների վրա հաչում էին: Եթե պատահական մարդիկ անցնում էին, նրանք անպայման հաչում էին, բոլորը վախենում էին: Նրանք բավականին մեծ էին, և սարսափելի էր գիշերը փողոց դուրս գալը, ճիշտն ասած: Երբ ինչ-որ շուն էր հայտնվում, օրինակ, քաղաքային այգու մոտ, ապա այս շներն այնքան էին հաչում, որ պատահական անցորդը վախենում էր»,- պատմում է Թամար Թագուհու փողոցի բնակիչներից մեկը։
Jnews-ի հետ զրույցում քաղաքի շատ բնակիչներ նշում են, որ շներին խղճում են, չի կարելի նրանց վրա կրակել։ Սակայն նշում են, որ խնդիրն այլ լուծում չի գտնում:
Jnews-ը բազմիցս բարձրացրել է անօթևան կենդանիների, մասնավորապես՝ շների պաշտպանության հարցը։ Քանի որ Վրաստանի օրենսդրության համաձայն, թափառող շների վրա կրակելն արգելված է։ Ախալքալաքի քաղաքապետարանի Բնապահպանության ծառայության բաժնի պետ Ռամազ Խուցիշվիլին չգիտեր, որ քաղաքում սկսել են թափառող շներին կրակել։ Նրա խոսքով՝ այս հարցը վերաբերում է ոստիկանությանը:
«Քաղաքապետարանը չի կարող արձագանքել այս հարցերին, սա արդեն ոստիկանության պարտականությունն է: Ես չգիտեմ, թե նման դեպքերում ինչ միջոցներ են ձեռնարկվում: Սա առաջին դեպքն է, ես ընդհանրապես նման դեպքի մասին չեմ լսել: Նման իրավիճակ եղել է, նման տեսանյութ կար Youtube-ում: Բայց ով էր դա, գտե՞լ էին, թե՞ ոչ, չգիտեմ: Որ օրենսդրությամբ՝ վարչական, թե այլ, ես չգիտեմ, պարզ չէ՝ կրակել են ատրճանակով թե հրացանով»,- ասում է Ռամազ Խուցիշվիլին։
2017 թվականից մունիցիպալ իշխանությունները միջոցներ են հատկացնում շներին բռնելու և ստերիլիզացնելու համար։ Ախալքալաքի մունիցիպալիտետի բյուջեով այս տարի նույնպես հատկացվել է 26 000 լարի, սակայն տենդերն այդպես էլ չի հայտարարվել։ Եթե այն հայտարարվեր տարեսկզբին, ապա թափառող շների թիվը հնարավոր է կտրուկ չավելանար, քանի որ նրանցից շատերը չէին հասցնի ցնկնել։ Հիմա թափառող շների թիվը բազմապատկվել է։
Քաղաքապետարանի Տնտեսության վարչության պետ Մնացական Փամբուխչյանն օգոստոսի 8-ին Jnews-ի հետ զրույցում հաղորդել էր, որ խնդիրը կայանում է նրանում, որ քաղաքապետարանը չի կարողանում գտնել մարդկանց կամ ընկերություններ, որոնք կկարողանային քաղաքապետարանի չափանիշներին համապատասխան իրականացնել այս գործողությունը։
«Այս հարցում փոփոխություններ չկան: Ինչո՞ւ է այս հարցը ձեզ բոլորիդ հետաքրքրում: Հաջորդ ամիս այս հարցը կլուծվի»,- մեկնաբանեց Մնացական Փամբուխչյանը՝ չհստակեցնելով, թե ինչպես է այն լուծվելու։
Լուսանկարը՝ JNEWS-ի արխիվից
