Այսօր՝ օգոստոսի 2-ին, Խուլգումոյում տոնական տրամադրության ներքո տեղի ունեցավ գյուղի հանդիսությունների սրահի բացման հանդիսավոր արարողությունը, որին խուլգումոցիները երկար էին սպասել:
Սրահը վերանորոգվել է ժամանակակից չափանիշներին համահունչ: Հանդիսությունների սրահի գլխավոր պատին նկարազարդված է Խուլգումո գյուղի սիմվոլը՝ «Թումաս»-ի կամուրջը:
Միջոցառումը սկսեց Սեդա Գիգոլյանը՝ «Թող գյուղի խորհրդանիշ «Թումաս» կամուրջը տունդարձի ճանապարհների խաչմերուկ, սիրո և միասնության ամուր կամուրջ դառնա, ու թող այս սրահից միշտ հնչի ուրախության հանդիսությունների ձայներ» խոսքերով: Այնուհետև պարային համարներով հանդես եկավ «Ջավախք» պարի անսամբլը, իսկ ժապավենը կտրելու պատվավոր արարողությունը վերապահվել էր ավագ և կրտսեր Թումաս Չիվչյաններին: Կատարվեց նաև մատաղի հյուրասիրություն:
Հանուն գյուղի բարեկեցության, առանց ինչ-որ ակնկալիքի, վերանորոգման կազմակերպչական աշխատանքներն իրականացրել են Խուլգումոյի երեք երիտասարդներ՝ Արման Մանուկյանը, Աթուր Գիգոլյանը և Պետրոս Չիվչյանը:
«Հանգանակության միջոցներով ենք վերանորոգել, օգնել են ինչպես արտերկրում բնակվող խուլգումոցիները, այնպես էլ գյուղում: Աշխատանքները իրականացրել են Խուլգումոյի բնակիչները: Վարպետները սիմվոլիկ գումարով իրականացրել են այս ամենը»,- Jnews-ին ասաց Խուլգումոյի գյուղապետ Մովսես Գիգոլյանը:
Խուլգումոյի հանդիսությունների սրահը կառուցվել է չորս տասնամյակ առաջ, մի քանի անգամ թեթև վերանորոգվել է, սակայն երբերք չի հիմնանորոգվել:
«Արդեն 3 տարի է ընթանում են վերանորոգման աշխատանքները: Մի տարի կտուրն ենք փոխել, իսկ 2 տարում իրականացրել ենք ներսի աշխատանքները՝ մեր երիտասարդների և գյուղապետի անմիջական օգնությամբ կարողացանք իրականացնել աշխատանքները և ստանալ այսպիսի արդյունք», – jnews-ի հետ զրույցում ասաց Պետրոս Չիվչյանը։
Քանի որ կորոնավիրուսով պայմանավորված չէր թույլատրվում հանրային միջոցառումներ անցկացնել, առիթից օգտվելով խուլգումոցիները ներսի վերանորոգման գործընթացները կարողացել են կատարել սահմանափակումների ընթացքում։
«Այս ամենը մեծ նշանակություն ունի մեզ համար, արդեն հաստատ հարսանիքները գյուղում կանենք , անձամբ իմ հարսանիքը գյուղում եմ անելու», – ասաց Խուլգումոյի երիտասարդ բնակիչ Մովսեսը։
«Երկար ժամանակ է գյուղում չէր եղել հետաքրքիր միջոցառում: Սա մեզ համար մեծ առաջընթաց է, այս օրվան շատ ենք սպասել նախկինում շատ վատ վիճակում էր մեր հարսանյաց սրահը, շատ էինք ուզում, որ նորոգվեր», – ասաց Սոնա Թոփալյանը:
Միջոցառմանը ներկա էին Ախալքալաքի քաղաքապետ Մելքոն Մակարյանը, սակրեբուլոյի նախագահ Նաիրի Իրիցյանը, Վրաստանի խորհրդարանի պատգամավոր Սամվել Մանուկյանը, հոգևորականներ, տեղական ինքնակառավարման մարմնի ներկայացուցիչներ, խուլգումոցիներ և այլք:
