Այսօր՝ հուլիսի 1-ին, Ախալքալաքի երաժշտական դպրոցի դահլիճում տեղի ունեցավ հաշվետու համերգ, որին ելույթ ունեցան դպրոցի 50-ից ավելի սաներ:
Երաժշտական դպրոցն ամեն տարի հանդես է գալիս հաշվետու համերգով՝ սա որոշակի ամփոփում է և ձեռքբերումների ներկայացում։ Այս տարի փոքր դահլիճը լեփ-լեցուն էր: Համերգը վայելելու էին եկել Ախալքալաքի քաղաքապետ Մելքոն Մակարյանը, նրա տեղակալները, Սակրեբուլոյի պատգամավորներ, տեղական իշխանությունների այլ ներկայացուցիչներ, ինչպես նաև հոգևոր հայրեր։ Ներկա էին դպրոցի սաների ծնողներ և այլ աշակերտներ։ Համերգն սկսվեց երաժշտական դպրոցի երգչախմբի ելույթով։
Դպրոցի տնօրենի խոսքով՝ սա նաև յուրօրինակ ձերբազատում էր օնլայն ռեժիմից՝ ծանր համավարակից հետո։
«Ստեղծագործությունը հսկայական անխոնջ աշխատանք է, մշտական որոնում, նոր բարձրունքների ձգտում: Հաջորդ տարի մեզ մոտ ամեն ինչ լավ է լինելու, կլինեն նոր ձեռքբերումներ, պայծառ պահեր, նոր անուններ: Այս տարի մենք լավ արդյունքներ ունեցանք: Մեր ձեռքբերումների շարքերը համալրվեց 3 դափնեկիրներով, սա կատակ չէ նման փոքր դպրոցի համար, գումարած՝ երգչախմբային անվանակարգերը մայիս-ապրիլ ամիսներին: Իսկ հիմա մենք դարձել ենք «Սխվա Սաքարթվելո սադ արիս» մրցույթի հաղթողները և հրավիրված ենք քաղաք Մառնեուլի, որտեղ էլ կհանձնվեն մրցանակները»,- ասում է Ախալքալաքի երաժշտական դպրոցի տնօրեն Սվետլանա Կարոյանը։
Նշենք, որ Ախալքալաքի երաժշտական դպրոցում սովորում է 161 աշակերտ։ Այս դպրոցի շրջանավարտների շարքերում բազում տաղանդավոր երեխաներ կան, սակայն դպրոցը լավագույն վիճակում չէ և վերանորոգման կարիք ունի։
