Ախալքալաքի մունիցիպալիտետում դեռևս ոչ ոք հողատարածք չի վարձակալել «Մատչելիություն պետական արոտավայրերին» ծրագրով, ըստ որի խոշոր և մանր եղջերավոր անասուններ ունեցող ֆիզիկական և իրավաբանական անձինք կարող են արոտավայրեր վարձակալել երեք տարի ժամկետով։
«Մատչելիություն պետական արոտավայրերին» ծրագիրը մեկնարկել է
Կառավարության 2021 թվականի Հոկտեմբերի 6֊ի Թիվ 497 Հրամանագրով։ Ծրագիրը հետապնդում է պետական արոտավայրերի ռացիոնալ օգտագործման, անասնաբուծության խթանման նպատակներ։ Մեկ գլուխ խոշոր եղջերավոր անասունի համար սահմանվում է առնվազն 1 հա տարածք, մանր եղջերավոր անասունների դեպքում` առնվազն 0,2 հա տարածք:
Ախալքալաքի Պետական գույքի վարչության պետ Թամազ Գվարամաձեն ասում է, որ իրենք արոտավայրերի վարձակալության դիմումներն ուղարկել են Հողային ռեսուրսների օգտագործման մոնիտորինգի և կայուն կառավարման ազգային գործակալություն, քանի որ վարձակալմամ մասին որոշումը կայացվում է այդ գործակալությունում։
«Բոլոր դիմումները, որը մենք ունեինք, ուղարկել ենք գործակալություն, որ օրենքով սահմանված կարգով թույլտվություն տան։ Մինչ այժմ պետական արոտավայրերը ոչ մեկին վարձակալությամբ չեն տրվել։ Երբ գործակալությունը կուսումնասիրի փաստաթղթերը և կորոշի, թե ում հատկացնել, նրանք մեզ կուղարկեն, և մենք պայմանագրեր կկնքենք այդ մարդկանց հետ։ Դիմողներ եղել են։ Մենք բոլորին ասել ենք, որ դիմեն գործակալությանը»,- ասում է Թամազ Գվարամաձեն։
Նրա խոսքով, մինչ կառավարության այս որոշումը Ախալքալաքի մունիցիպալիտետում ոչ ոք չէր կարող պետական արոտավայրեր վարձակալել։
Ախալքալաքի և Նինոծմինդայի մունիցիպալիտետներից Ախալքալաքի Պետական գույքի վարչությունը մոտ 10 դիմում է ստացել արոտավայրերի վարձակալության թույլտվություն ստանալու համար։
Ինչ վերաբերում է Ջավախքի պահպանվող տարածքներում գտնվող արոտավայրերին, ապա դրանց վարձակալությունը չի դադարեցվել։ Ջավախեթի ազգային պարկից Ախալքալաքի և Նինոծմինդայի մունիցիպալիտետներում վարձակալվել է շուրջ 12 արոտավայր։ Այդ վարձակալությունները չեն կասեցվել, միայն մեկ անձի վարձակալության ժամկետն է լրացել։
