Վրաստանում գործող «կանաչ անձնագրերի» համակարգը վերանայման կարիք ունի՝ կորոնավիրուսի «օմիկրոն» շտամի տարածման համատեքստում։ Այս մասին PalitraNews-ին տված հարցազրույցում հայտարարել է առողջապահության փոխնախարար Թամար Գաբունիան։
2021 թվականի դեկտեմբերի 1-ից Վրաստանում գործում է թվային «կանաչ անձնագրերի» համակարգը։ Բազմաթիվ հանրային օբյեկտներ այցելելու համար 18 տարեկանից բարձր քաղաքացիները պետք է ներկայացնեն էլեկտրոնային փաստաթուղթ, որում գրանցված է վերջիններիս Կովիդ-կարգավիճակը։
«Դրա [համակարգի] վերանայումը պարտադիր կլինի, քանի որ իրավիճակը փոխվում է։ Omicron-ը մեզ շատ բաներ այլ կերպ ցույց տվեց, այլ երկրների փորձն էլ է տարբերվող։ Կարծում եմ, որ որոշակի ժամանակահատվածից հետո մենք անպայման կվերադառնանք այս հարցին և կվերլուծենք այն, ինչ տեղի է ունեցել մինչ այժմ»,- ասել է Գաբունիան։
Վրաստանի առողջապահության նախարարի տեղակալը հավելել է, որ Եվրոպան նույնպես փոխել է «կանաչ անձնագրերի» չափանիշները։ Միևնույն ժամանակ, Գաբունիան նշել է, որ ներկայիս համակարգը կարևոր դեր է խաղացել բնակչությանը կորոնավիրուսի դեմ պատվաստելու գործընթացում։
Վրաստանում քաղաքացին ստանում է «կանաչ կարգավիճակ», եթե նա ամբողջությամբ պատվաստված է, հիվանդ է եղել կորոնավիրուսով կամ վիրուսի հաստատումից անցել է առնվազն 14 օր, անցել է 72-ժամյա վավերականությամբ ՊՇՌ (PCR) թեստ, կամ հաձնել է հակագենի թեստ՝ 24-ժամյա վավերականությամբ։
QR-կոդը կամ Կովիդ-անձնագիրը կարելի է ձեռք բերել covidpass.moh.gov.ge կայքում կամ օգտագործելով Georgia e-Health բջջային հավելվածը։ Կովիդ-սերտիֆիկատը՝ կոդով, թղթային ձևով տրվում է նաև Վրաստանի Արդարադատության տներում և պատվաստման կենտրոններում։