Ախալքալաքի Հանրային առողջապահության կենտրոնը (ՀԱԿ) չի կարող կորոնավիրուսով վարակվածներին թեստավորել «Omicron» շտամի հայտնաբերման նպատակով, քանի որ նրանք չունեն համապատասխան թեստ։ Ընդհանուր առմամբ, Ախալքալաքում համաճարակային իրավիճակը հանգիստ է, թեև դժվար է որոշել դա արտացոլում է իրականությունը, թե գալիս է ամանորյա տոների կապակցությամբ բնակչության պասիվությունից։

«Մենք չենք կարող ասել, կա մեզ մոտ «օմիկրոն», թե ոչ, մենք չունենք այդ հետազոտությունը։ Տոներ էին, թեստ հանձնողները քիչ են եղել, օրական 2-3 դեպք է հայտնաբերվել, օրեր են եղել, որ կորոնավիրուսի դեպք ընդհանրապես չի գրանցվել։ Երկու օրից հնարավոր կլինի ասել, թե կորոնավիրուսի հետ կապված ինչ վիճակ է մեր մոտ»,- ասաց ՀԱԿ տնօրենի պաշտոնակատար Սիրուշիկ Տոնականյանը:

Այսօր՝ հունվարի 10-ին, Ախալքալաքի Հանրային առողջապահության կենտրոնում (ՀԱԿ) կատարվել է 104 թեստ, որից 90-ը՝ հակագենի, 14-ը՝ ՊՇՌ մետոթով, արդյունքում հայտնաբերվել է կորոնավիրուսային վարակի 6 դեպք։

Ախալքալաքի բազմաթիվ բնակիչներ ամանորյա տոները նշել են Թբիլիսիում, որտեղ արդեն տարածված է «օմիկրոն» շտամը։

Հիվանդությունների վերահսկման ազգային կենտրոնը (ՀՎԱԿ) հանրապետությունում կանխատեսում է հիվանդության աճ, հորդորում է զգույշ լինել և պատվաստվել։