Ախալքալաքի մունիցիպալիտետի քաղաքապետարանը կրկին միջոցներ է հատկացրել Ախալքալաքի անասնապահական շուկայի վերանորոգման համար, այս անգամ, շուկայի տարածքում ջուր անցկացնելու համար: Չնայած այն հանգամանքին, որ 2019 թվականին շուկայի փակման պատճառներից մեկը հենց ջրի բացակայությունն էր:
Անասնաշուկայի տարածքում ջրագծի անցկացման համար Ախալքալաքի տեղական բյուջեից հատկացվել է 1985 լարի: Անասնաշուկան վերանորոգվել էր այս տարվա մայիսին, սակայն նախագծում ջրագծի անցկացում նախատեսված չէր։
Անասնաշուկայի տնօրեն Սոնա Վարդանյանի խոսքով, շուկան մեկուկես տարի առաջ փակվել էր սանիտարական չափանիշներին չհամապատասխանելու պատճառով, ավելի կոնկրետ՝ շուկայում ջրի և ցանկապատի բացակայության պատճառով:
Ախալքալաքի մունիցիպալիտետը, այս տարվա մայիսին, տեղական բյուջեից, անասնաշուկայի վերանորոգման համար հատկացրել էր 13 135 լարի, սակայն նախագծով շուկայի ներսում ջուր չէին նախատեսել: Վերականգնողական աշխատանքներն ավարտված են, սակայն Սննդի ազգային գործակալության տարածաշրջանային գրասենյակը շուկային աշխատելու թույլտվություն չի տալիս:
Վերանորոգումից երկու ամիս անց տեղական բյուջեից կրկին միջոցներ են հատկացվում տարածքում ջուր անցկացնեկու նպատակով: Այդ աշխատանքի համար կազմվում է նախահաշիվ և նախագիծ, որոնք անվճար չեն:
Սոնա Վարդանյանի խոսքով, անասնաշուկան առանց ջրի անհնար է պատկերացնել:
«Ասացին (խմբ. շինարարները) նախագիծն արդեն այսպես է կազմված, ես առաջարկեցի գոնե լրացուցիչ դարպաս բացել, որպեսզի վաճառողները, ջրից օգտվելու համար, չշրջանցեն շուկան, այլ կարողանան շուկայից դուրս գալ և օգտվել ջրից: Ասացին,որ նախագծով դա նախատեսված չէ, իսկ իրենք իրավունք չունեն նախագծից դուրս որևէ բան կառուցել », – ասում է Սոնա Վարդանյանը:
Ախալքալաքի մունիցիպալիտետի քաղաքապետարանի Ենթակառուցվածքների, ճարտարապետության և շինարարության ծառայության պետ Ռաֆիկ Աբաջյանն ասաց, որ առաջին անգամ նախագծում չէր նախատեսվել ֆինանսներից ելնելով, այդ ժամանակ միջոցներ չեն եղել:
Այսօր մարդիկ իրենց անասունները վաճառում են անասնաշուկայի ոչ հեռու՝ գերեզմանատան մուտքի մոտ, առանց բժշկի:
Ախալքալաքի անասնաշուկան գործում է ավելի քան քսան տարի, հանգստյան օրերին, շուկան ուներ բժիշկ և վերահսկիչ:
Վերահսկիչ Սոնա Վարդանյանի խոսքով, իրենք ամսական 150 լարի վարձավճարով վարձակալել են անասնաշուկան:
