Պետական տեսչության ծառայությունը վարչական պատասխանատվություն է սահմանել Նինոծմինդայի մանկատան վրա՝ օրենքի խախտմամբ անչափահասների տեսա-ձայնագրությունների հրապարակման համար:
Գերատեսչության տեղեկատվության համաձայն՝ Պետական տեսչության ծառայությունն ուսումնասիրել է Նինոծմինդայի Սուրբ Նինոյի անվան մանկատան որբացած, անապաստան և ծնողական խնամքից զրկված անչափահաս շահառուների տեսա-ձայնագրությունների ֆեյսբուք սոցիալական ցանցի միջոցով հրապարակման օրինականությունը:
Ստուգման արդյունքում հաստատվել է, որ 2021 թվականի հունիսի 4-ին մանկատան ղեկավարը ֆեյսբուքի իր անձնական էջում, այսպես կոչված, «ուղիղ եթերում» հրապարակայնորեն տեղադրել է մանկատան անչափահաս շահառուների աուդիո և վիդեո ձայնագրությունները: Տեսաձայնագրություններից հնարավոր է դարձել լիովին բացահայտել անչափահաս շահառուներին: Մասնավորապես, տեսաձայնագրություններում հրապարակայնորեն հասանելի էին անչափահասների տարբեր տվյալներ՝ անուններ, ազգանուններ, տեսողական պատկերներ, ձայն, հոգե-հուզական վիճակ, երեխաների մանկատան հոգածության տակ գտնվելու և առկա/ցանկալի բնակության վայրի մասին տեղեկություններ, նրանց հարազատների անունները և հեռախոսահամարները:
Ինչպես նշվում է, աուդիո և վիդեո ձայնագրությունները, որոնք հրապարակայնորեն հասանելի են եղել սոցիալական ցանցում մոտ մեկ ամիս, հավաքել են հազարավոր դիտումներ, մեկնաբանություններ և ստացել բազում արձագանքներ: Միևնույն ժամանակ, սոցիալական ցանցի ցանկացած օգտատեր կարող էր ամրագրել գրառումների վերաբերյալ իր կարծիքը կամ դրանցով կիսվել սեփական էջում և վերբեռնել դրանք:
«Հարկ է նշել, որ ստուգման ընթացքում մանկատունը չի համագործակցել Պետական տեսչության ծառայության հետ: Մասնավորապես, Ծառայությանը չի տրամադրվել պահանջված տեղեկատվությունը: Պետական տեսուչի որոշմամբ` «Անձնական տվյալների պաշտպանության մասին» Վրաստանի օրենքի 44-րդ և 53-րդ հոդվածների հիման վրա` որբացած, անապաստան և ծնողական խնամքից զրկված անչափահաս երեխաների համար նախատեսված Նինոծմինդայի Սուրբ Նինոյի անվան մանկատան վրա վարչական պատասխանատվություն է դրվել՝ անչափահասների տվյալների անհամաչափ հրապարակման և Պետական տեսչության ծառայության պահանջները չկատարելու համար», – նշում են գերատեսչությունից: