«Վրացական երազանքի» առաջնորդներ՝ վարչապետ Գիորգի Գախարիան, Թբիլիսիի քաղաքապետ Կախա Կալաձեն և Իրակլի Կոբախիձեն Ախալքալաքում ներկայացրեցին Ախալքալաք-Նինոծմինդա ընտրատարածքի իրենց մեծամասնական թեկնածու Սամվել Մանուկյանին:
COVID-19 համավարակի թելադրած պայմաններում իշխող «Վրացական երազանք-Ժողովրդավարական Վրաստան» կուսակցությունից թեկնածու Սամվել Մանուկյանի ներկայացումը տեղի ունեցավ բաց տարածքում, Ախալքալաքի բերդի ներսում և սահմանափակ թվով մարդկանց ներկայությամբ: Հրավիրված 265 հյուրերի աթոռները տեղակայված էին ըստ պահանջների՝ միմյանցից մեկ մետր հեռավորության պահպանմամբ: Վրաստանի վարչապետ Գիորգի Գախարիան իր վարչապետության օրոք առաջին անգամ էր այցելում Ախալքալաք: Թեկնածուի ներկայացմանը հրավիրված էին նաև նահանգապետ Բեսիկ Ամիրանաշվիլին, Ախալքալաքից և Նինոծմինդայից տեղական ինքնակառավարման մարմինների ներկայացուցիչներ, տարբեր պետական ուսումնական հաստատությունների տնօրեններ և Ախալքալաքում գտնվող «Վրացական երազանքի» որոշ կողմնակիցներ:
Գիորգի Գախարիան իր խոսքում կարևորեց բազմազգության դերը երկրի զարգացման և ամրապնդման գործում:
«Կովկասի բազմազգությունը մեր ուժն է: Մենք միշտ աշխատել և աշխատում ենք, որպեսզի Վրաստանում միշտ հանգստություն լինի: Դրա համար մենք պետք է աշխատենք խաղաղ պայմաններում, որպեսզի մեր երկիրն էլ ավելի հզորանա: Ախալքալաքի բյուջեն 2003 թվականին ունեցել է 390 000 լարի եկամուտ: Այս տարի բյուջեի եկամուտներն արդեն կազմում են 10 միլիոն լարի: Դա տեղի է ունենում այն պատճառով, որ Ախալքալաքում ստեղծվում են նոր բիզնեսներ և ձեռնարկություններ: Ախալքալաքում գյուղացին դառնում է ուժեղ ֆերմեր», – ասել է Գախարիան՝ նշելով գյուղի զարգացմանն ուղղված որոշ ծրագրեր:
Վարչապետը խոսեց նաև «Վրացական երազանք»-ի առաջիկա 4 տարիների ծրագրերի մասին:
«Նախ և առաջ մենք պատրաստվում ենք առնվազն 20 միլիարդ լարի ծախսել ենթակառուցվածքային ծրագրերի վրա: Դուք տեսել եք Ախալցիխեից Ախալքալաք տանող ճանապարհի վատ վիճակը, որի վերականգնումը շարունակվում է, և շուտով կավարտվի: Լավ վիճակում է, սակայն էլ ավելի զարգացման կարիք ունի Ախալքալաք-Նինոծմինդա ճանապարհը նույնպես: Կարգի կբերվեն նաեւ Ախալքալաքի ներքաղաքային ճանապարհները: Զբոսաշրջիկների մոտ հետաքրքրություն առաջացնելու համար կվերականգնվի նաև Ախալքալաքի բերդը: Դա մենք բոլորս միասին պետք է անենք, բայց ամենակարևորն այն է, որ ոչ մի տարբերություն չպիտի դրվի ըստ քաղաքացու բնակության, կապ չունի որտեղ է ապրում քաղաքացին՝ Ախալքալաքում, Բաթումիում, Ռուսթավիում թե Ախալցիխեում», – իր ելույթում ասաց Գիորգի Գախարիան:
Ելույթ ունեցան նաեւ Իրակլի Կոբախիձեն ու Կախա Կալաձեն՝ ներկայացնելով մեծամասնական ընտրակարգով պատգամավորի թեկնածուին:
Սամվել Մանուկյանը վրացերենով ողջունեց բարձրաստիճան հյուրերին, շնորհակալություն հայտնեց նրանց ժամանման համար, ինչպես նաև շնորհակալություն հայտնեց յուրաքանչյուր ախալքալաքցու, ով այսօր իր հետ է:
«Ես շարունակեմ խոսել իմ մայրենի լեզվով, որպեսզի իմ համաքաղաքացիները կարողանան հասկանալ, թե ինչ եմ ուզում ասել», – ասաց Սամվել Մանուկյանը և շարունակեց իր խոսքը հայերենով:
«Ես հպարտ եմ, որ մի քաղաքում տարբեր ազգություններ հանդուրժողականության հիանալի օրինակ են ծառայում` միմյանց հետ միասին ապրելով հայրենիքի հանդեպ փոխադարձ սիրով և հոգատարությամբ: Սա այն քաղաքն է, որտեղ դարեր շարունակ կողք կողքի ապրել են եղբայրական ժողովուրդները՝ վրացիներն ու հայերը: Այստեղ՝ Ախալքալաքում, կա պատմական բերդաքաղաք, որը թվագրվում է 11-րդ դարով: Այս բերդը շատ բան է տեսել: Այն արտացոլում է մեր բազմազգ երկրի պատմությունը: Եվ այս բերդաքաղաքը հանդուրժողականության և մարտական ոգու փայլուն խորհրդանիշ է: Այս մարտական ոգին է ինձ մղում այս ուղղությամբ տեսնելու իմ երկիրն ու ապագան: Իհարկե, դա դժվար կլինի առանց տնտեսական զարգացման: Դուք տեսնում եք, թե ինչպես է պետությունը տարածաշրջանում ապրող մարդկանց օգնում գյուղատնտեսությունը զարգացնել՝ ավելացնելով նրանց եկամուտները, ստեղծելով պատշաճ կենսապայմաններ: Փաստ է, որ «Վրացական երազանքը» ծառայում է բնակչությանը իշխանության գալուց ի վեր, այն բարելավել է իրավիճակը բոլոր ոլորտներում, որոնք ստեղծվել էին մինչ 2012 թվականը», – ասաց Սամվել Մանուկյանը:
Դրանից հետո պատգամավորի թեկնածուն ներկայացրեց իրականացված նախագծերը:
«Առանձնահատուկ ուշադրություն է դարձվում գյուղատնտեսության զարգացմանը: 2014-2020 թվականներին Ախալքալաքի մունիցիպալիտետում ստեղծվել է ընդհանուր առմամբ 86 կոոպերատիվ: Իրականացվում է գյուղատնտեսական ապահովագրության ծրագիրը: 2014-2020 թվականներից ապահովագրվել է 2965 հա տարածք, իսկ բերքի ապահովագրման գինը կազմել է 26 849 093 լարի: Իհարկե, փոքր և միկրոբիզնեսի խթանման ծրագիրը կշարունակվի, որի շրջանակներում «Արտադրիր Վրաստանում» ծրագրի շրջանակներում մունիցիպալիտետում տրվել է 546 000 լարի ֆինանսավորում: Ենթակառուցվածքների առումով Ախալքալաքում իրականացվում են աննախադեպ մասշտաբի նախագծեր: 2013-2015 թվականներին տեղական ճանապարհային նախագծերի վրա ծախսվել է 20 միլիոն լարի: Նշված ժամանակահատվածում մունիցիպալիտետում վերականգնվել է ավելի քան 12 կամուրջ, ավարտին է մոտենում Ախալքալաքից Նինոծմինդա տանող ճանապարհի կառուցումը», – իր խոսքում ասաց Սամվել Մանուկյանը, ապա ներկայացրեց Սումբատ Կյուրեղյանին, ով առաջադրվել է համամասնական ընտրակարգով:
Այնուհետև «Վրացական երազանքի» պատվիրակությունը մեկնեց Նինոծմինդա՝ ներկայացնելու մեծամասնական և համամասնական ընտրակարգով իրենց թեկնածուներին:
