Ախալքալաքում միանգամից նշեցին մի քանի իրադարձություն, Խաչվերացի տոնը, Սուրբ Խաչ եկեղեցու վերանորոգված բակի բացումը, մարզիկների մեծարումն ու իշխող «Վրացական երազանք – Դեմոկրատական Վրաստան» կուսակցության նախընտրական քարոզարշավը:
Այսօր Ախալքալաքում մարդաշատ էր ու անսովոր աշխույժ: Բնակչության մի մասը հավաքվել էր Սուրբ Խաչ եկեղեցում տոնելու Սուրբ Խաչի վեհացման տոնը, իսկ ավելի մեծ մասը քաղաքի կենտրոնում` Ախալքալաքում, «Վրացական երազանքի» շտաբի մոտ:
Եկեղեցական տոնակատարությունն սկսվեց Սուրբ պատարագով: Խաչվերացը Հայ Եկեղեցու հինգ տաղավար տոներից վերջինն է: Այն Խաչին նվիրված տոներից ամենակարևորն է, որովհետև նվիրված է գերությունից խաչի վերադարձի և փառաբանության հիշատակին:
Ավանդության համաձայն, Երուսաղեմի առաջին եպիսկոպոս Հակոբը, գտնելով Քրիստոսի Խաչի մի մասնիկ, բարձրացրեց այն ի ցույց հավատացյալներին` «Ով Քրիստոս, Քո Խաչին ենք մենք երկրպագում» երգի ներքո: Մեկ այլ ավանդույթում նշվում է, որ թագուհի Հելենայի (Կոնստանտինոս Մեծ կայսեր մայրը) կողմից գտնված Սուրբ խաչը բարձրացվել է Երուսաղեմի պատրիարք Մակարի կողմից, հավաքվածների գլխավերեւում, որ նրանք տեսնեն ու երկրպագեն այն:
Պատարագից հետո Սուրբ Խաչ եկեղեցու բակում հավաքվեցին Վրացական երազանքի ակտիվիստները, «Վրացական երազանքից» խորհրդարանի պատգամավոր Հենզել Մկոյանը, Ախալքալաքի քաղաքապետի թեկնածու Յուրիկ Ունանյանն ու Նինոծմինդայի քաղաքապետի թեկնածու Անիվարդ Մոսոյանը, ինչպես նաեւ տեղական իշխանությունների ներկայացուցիչներ: Ներկա էին հյուրեր Հայաստանից, ԱԺ պատգամավոր Հայկ Բաբուխանյանը եւ ՀՀԿ փոխնախագահ, գաղափարախոսության հանձնաժողովի նախագահ Մուշեղ Լալայանը:
Հետո հնչեցին Վրաստանի, Հայաստանի օրհներգները և Վրաստանի իշխող կուսակցության դրոշներով մեքենաների ազդանշանները, այդ մեքենաների վրա կանգնած էին երեք չեմպիոնները. Ախալքալաքցի մարզիկները, ովքեր մրցանակային հորիզոնականներ են զբաղեցրել տարբեր մրցաշարերում` Արտյոմ Յորդանյանը, Նաիրի Մելիքյանը և Օթար Երանոսյանը: Նրանց դիմացով անցնում էր մեկ այլ մեքենա բարձրախոսով, որից բարձր հնչում էր Ախալքալաքի քաղաքապետի թեկնածու Սամվել Պետրոսյանի նախընտրական տեքստը («Վրաստանի Հայրենասերների դաշինքից»):
Ներկաները ջերմ ծափահարությունների դիմավորեցին մարզիկներին, ինչպես նաև նրանց մարզիչներին` շնորհակալություն հայտնելով նրանց նվաճած մրցանակների և հաջողությունների համար: Այնուհետեւ ելույթ ունեցավ Վրաստանի Խորհրդարանի պատգամավոր Հենզել Մկոյանը:
«Այսօր իսկապես կրկնակի տոն է, այսօր Սուրբ Խաչի տոնն է, քանի որ մեր եկեղեցին, որը կառուցել են մեր պապերը, կոչվել է Սուրբ Խաչ: Շնորհավորում եմ բոլորին տոնի կապակցությամբ, ցանկանում եմ շնորհակալություն հայտնել ձեզ բոլորիդ, քանի որ դուք այսօր ներկա եք այստեղ մեզ հետ: Այսօր Սուրբ Խաչի տոնն է ինչպես նաև չեմպիոնների մեծարման օրը, մենք պետք է հպարտանանք նրանցով, քանի որ նրանք հաղթանակ բերեցին ոչ միայն Վրաստանին, այլև ուրախացրեցին մեզ: Վերջին 8 տարվա ընթացքում Վրաստանում բռնցքամարտի չեմպիոններ չկային: Երանոսյանը մեր հպարտությունն է, մեր Վրաստանի համար: Եվ կրկնակի երջանիկ եմ, որ Երանոսյանը Ջավախքից է, Ախալքալաքից: Ուստի, սրտանց շնորհավորում եմ և ուզում եմ, որ մեզանից ստանան նվերներ, որոնք պատրաստել ենք նրանց համար», – ասաց Հենզել Մկոյանը` յուրաքանչյուր մարզիկին հանձնելով ծրարներ:
Ելույթ ունեցավ նաև Տեր Բաբգէն վրդ Սալբյանը, նա շնորհակալություն հայտնեց Վրաստանին, տեղական իշխանություններին և խորհրդարանի պատգամավորին, ներկայացրեց Հայաստանի ԱԺ պատգամավոր Հայկ Բաբուխանյանին, ով հանձնեց արքեպիսկոպոս Կարապետ Բագրատունու արձանը (օրը տեղադրված է Սուրբ Խաչ եկեղեցու բակում), Լևոն Գրիգորյանին փոխանցելով Հայաստանի Սփյուռքի նախարարության կողմից Արշիլ Գորկու անվան մեդալ:
«Ջավախքը ամենակարևոր տարածքն է, բարեկամության կամուրջը, բարեկամության հիմքը` հայերի և վրացիների միջև: Եվ մենք շնորհակալ ենք ձեզ դրա համար», – իր ելույթում ասաց Հայկ Բաբուխանյանը:
Տոնակատարությունն ավարտվեց խորհրդարանի անդամ Մկոյանի ընտանիքի կողմից մատաղով և տոնական համերգով, որտեղ ելույթ ունեցան երեք պարային համույթներ` «Ջավախք», «Վաչիան» և «Մուրջի»: Ելույթ ունեցան նաև Ախալքալաքի աշուղական դպրոցի սաները:
Քրիստինե Մարաբյան
