Վրաստանի ֆինանսների նախարարության քննչական ծառայությունը Բաթումիում բացահայտել է կեղծ ակցիզային դրոշմանիշներով ալկոհոլային խմիչքների արտադրություն և վաճառք: Յոթ անձի դեմ հարուցվել է քրեական գործ, որոնցից երեքն արդեն ձերբակալվել են:

Հետաքննության համաձայն՝ մեղադրյալները կազմակերպել են ժամանակավոր արհեստանոցներ, որտեղ համակարգված կերպով արտադրել են հայտնի ապրանքանիշերի կեղծ վիսկի, ինչպես նաև այլ ոգելից խմիչքներ՝ օգտագործելով անհայտ ծագման ալկոհոլ և հատուկ հավելումներ: Պատրաստի արտադրանքը կպցվել է կեղծ ակցիզային դրոշմանիշներով և առաքվել Աջարիայի բարեր և խանութներ:

Ինքնաշեն արհեստանոցների և մանրածախ առևտրի կետերի խուզարկությունների ժամանակ իրավապահ մարմինների աշխատակիցները առգրավել են հետևյալը.

• կեղծ Chivas Regal, Jack Daniel’s, Johnnie Walker Red Label, Jameson, Grey Goose և այլ ապրանքանիշեր.

• հայտնի համաշխարհային ապրանքանիշերի օգտագործված շշերի մեծ քանակություն,

• անհայտ ծագման ալկոհոլային խմիչքներ,

• կեղծ ակցիզային դրոշմանիշներ և դրանց արտադրության համար նախատեսված սարքավորումներ:

Քննչական մարմիններն այժմ ինտենսիվ միջոցառումներ են իրականացնում մանրածախ ցանցից կեղծ ապրանքներն առգրավելու և սխեմայի մնացած մասնակիցներին բացահայտելու համար:

Հետաքննությունը տարվում է Վրաստանի ՔՕ 197-րդ հոդվածի 1-ին մասի, 197¹ հոդվածի և 200¹ հոդվածի 2-րդ մասի «բ» ենթակետով։ Այս մեղադրանքները նախատեսում են 4-ից 6 տարի ազատազրկում։