CNN-ը հաղորդում է, որ հրշեջները պայքարում են ֆրանսիական Բորդո և իսպանական Մադրիդ քաղաքների մոտակայքում բռնկված անտառային հրդեհների դեմ։

Ֆրանսիայի նախագահ Էմանուել Մակրոնը հայտարարել է, որ Լանդ շրջանում հրդեհները տեղայնացվել են, իսկ Ժիրոնդ շրջանում՝ կայունացվել, սակայն ընդգծել է, որ Ֆրանսիան շարունակում է պայքարել Երկրորդ համաշխարհային պատերազմից ի վեր ամենամեծ անտառային հրդեհների դեմ։

«Մենք պետք է հասկանանք, որ մենք պայքարում ենք բոլորովին աննախադեպ հրդեհի դեմ։ Այսօրվա իրավիճակը ամենածանրն է, որը երբևէ գրանցվել է, ամենաբարդը՝ Երկրորդ համաշխարհային պատերազմից ի վեր։ Ավելի քան 160,000 հեկտար արդեն այրվել է, և սեզոնը դեռ շատ հեռու է ավարտից», — նշել է Մակրոնը Ժիրոնդ շրջանում գտնվող Բորդոյի հրշեջ-փրկարարական գործողությունների կենտրոն այցելության ժամանակ։

CNN-ը, հղում անելով ֆրանսիական իշխանություններին, հաղորդում է, որ Բուշ-դյու-Ռոն շրջանում անտառային հրդեհի դեմ պայքարելիս մահացել է կամավոր հրշեջ։

Ֆրանսիայի վարչապետ Սեբաստիան Լեկորնյուի խոսքով՝ հուլիսի 6-ից ի վեր երկրում ձերբակալվել կամ հարցաքննվել է ավելի քան 160 մարդ՝ կանխամտածված հրկիզման մեղադրանքով։

«Այս հրդեհներից ոչ բոլորն էին պատահական բռնկվել։ Որոշները դիտավորյալ են կազմակերպվել. սա հանցագործություն է, որը պատժվում է 15 տարվա ազատազրկմամբ», — ասաց Սեբաստիան Լեկորնյուն։

Վերջինիս խոսքով՝ հրդեհները հիմնականում անզգուշության՝ ծխախոտի մնացորդները նետելու, խորովածի կամ անվտանգության միջոցառումների բացակայության պայմաններում կատարված աշխատանքի արդյունք են։ Ֆրանսիայի հրշեջ ծառայությունը հայտարարել է, որ «հրդեհը կարող է շարունակվել մի քանի շաբաթ, հնարավոր է՝ նույնիսկ մի քանի ամիս, մինչև այն լիովին մարվի»։

Ամբողջ երկրում հրդեհները մարելու համար «Black Hawk» ուղղաթիռներ են ուղարկվում։

Ըստ Իսպանիայի Ներքին գործերի նախարարության՝ առնվազն 63,152 մարդ տեղահանվել է իրենց տներից Մադրիդի, Տոլեդոյի և Ավիլայի շրջաններում անտառային հրդեհների պատճառով։ Նախարարությունը ժամանակավորապես դադարեցրել է բերքահավաքի աշխատանքները՝ օգտագործելով գյուղատնտեսական տեխնիկա այս երեք շրջաններում։

Իսպանիայի շրջակա միջավայրի անցումային շրջանի նախարար Սառա Աագեսենը հայտարարել է, որ Ավիլա նահանգում հրդեհն այրել է ավելի քան 50 հազ. հեկտար տարածք, ինչը այն դարձնում է Իսպանիայի պատմության մեջ ամենամեծ անտառային հրդեհը։ Միայն այս նահանգում տարհանվել է ավելի քան 25 հազ. մարդ։