Այսօր՝ հունիսի 24-ին, Ախալքալաքի Մշակույթի տանը տեղի ունեցավ Ախալքալաքի վրացական ժողովրդական պարի «Մուրջի» համույթի ամենամյա համերգը։
Տարիներ շարունակ «Մուրջի» վրացական ժողովրդական պարի անսամբլն ուսումնական տարին ամփոփում է եզրափակիչ համերգով, որի մուտքը միշտ անվճար է։ Այս անգամ դահլիճը գրեթե լիքն էր հանդիսատեսով, ներկա էին համույթի պարողների ծնողներն ու հարազատները, ինչպես նաև տեղական իշխանությունների ներկայացուցիչներ, հոգևորականներ եւ այլք։
«Մուրջի» անսամբլը ղեկավարում է Գիորգի Մետրևելին։ Մարիամ Մոգեբաձեն նրա հետ դասավանդում է նաև վրացական ժողովրդական պարեր։ Անսամբլը միավորում է տարբեր ազգությունների երեխաների՝ վրացիների, հայերի, հույների և այլոց, որոնք ծանոթանում են վրացական մշակույթին և սովորում ժողովրդական պարեր։ Այս տարի ամփոփիչ համերգին երեք տարիքային խմբերի երեխաները կատարեցին 20 վրացական ժողովրդական պար և մեկ հայկական ժողովրդական պար՝ «Ծաղկափունջ»։
Անսամբլի երեք խմբերից յուրաքանչյուրն ունի իր սեփական պարային բեմադրությունն ու ավանդական տարազը: Ամեն տարի համույթը համալրվում է՝ պարողները ավարտում են դպրոցները և շարունակում իրենց կրթությունը վրացական համալսարաններում, իսկ նոր անդամները զբաղեցնում են նրանց տեղերը: Այս տարի համույթը լքել է միայն մեկ պարուհի, ամբողջ անսամբլը նրան հրաժեշտ է տվել արցունքն աչքերին: