Ռումինիան փակել է Կոնստանցայում գտնվող ՌԴ հյուպատոսությունը և Ռուսաստանի հյուպատոսին հայտարարել է «պերսոնա նոն գրատա»։
Այս մասին լրագրողներին հայտնել է Ռումինիայի նախագահ Նիկուշոր Դանը Գերագույն ազգային պաշտպանության խորհրդի նիստից հետո։
«Մենք գիտենք անօդաչու թռչող սարքի թռիչքի հետագիծը, գիտենք, թե որտեղից է այն եկել Ուկրաինայի միջով և որտեղից է մտել Ռումինիա։ Այն Ուկրաինայում թիրախների դեմ ուղարկված 43 անօդաչու թռչող սարքերից մեկն էր», — նշել է Նիկուշոր Դանը։
Ռումինիայի սահմանային Գալաց քաղաքում անօդաչու թռչող սարքը բախվել է 10-հարկանի բնակելի շենքի, որի հետևանքով տուժել է երկու մարդ։ Ռումինիայի պաշտպանության նախարարությունը հայտարարել է, որ անօդաչու թռչող սարքը ռուսական է։
Ռումինիայի արտաքին գործերի նախարար Օանա-Սիլվիա Ցոյուն արձագանքել է միջադեպին։ Նա հայտարարել է, որ Ռումինիան կձեռնարկի անհրաժեշտ դիվանագիտական միջոցներ՝ ի պատասխան օդային տարածքի այս լուրջ խախտման։
