Իսպանիայի Տոլեդո քաղաքում ընթացող Ինտերպոլի 53-րդ Եվրոպական տարածաշրջանային համաժողովում մասնակից երկրների մեծամասնությունը քվեարկել է հաջորդ տարածաշրջանային համաժողովը՝ 54-րդը, 2027 թվականին հյուրընկալելու օգտին։ Այս մասին հայտարարում է Վրաստանի Ներքին գործերի նախարարությունը։
Նախարարության տվյալներով՝ այս որոշումը ևս մեկ անգամ ընդգծում է Վրաստանի իրավապահ մարմինների և նրանց եվրոպացի գործընկերների միջև արդյունավետ և հաջող համագործակցությունը, ինչպես նաև երկրի աճող դերն ու վստահությունը միջազգային ոստիկանական համագործակցության մեջ։
Վրացական պատվիրակությունը համաժողովում ներկայացրել են Կենտրոնական քրեական ոստիկանության դեպարտամենտի տնօրենի տեղակալ Իրակլի Դոնդոլաձեն, Վրաստանում Ինտերպոլի ազգային կենտրոնական բյուրոյի ղեկավար Գիորգի Բոլոտաշվիլին և Իսպանիայի Թագավորությունում Վրաստանի Ներքին գործերի նախարարության ոստիկանական կցորդ Շալվա Շուբլաձեն։
Քվեարկությունից առաջ վրացական պատվիրակության ներկայացուցիչները համաժողովի մասնակիցներին ներկայացրել են վրացական ոստիկանության կողմից կազմակերպված հանցագործության և թմրանյութերի ապօրինի շրջանառության դեմ պայքարում ձեռք բերված նշանակալի ձեռքբերումները, միջազգային գործողություններում հաջող համագործակցությունը և երկրի իրավապահ համակարգի ներկայիս հնարավորությունները։
2027 թվականին Վրաստանում կայանալիք համաժողովին կմասնակցեն Ինտերպոլի գլխավոր քարտուղարության և գործադիր կոմիտեի ներկայացուցիչները, ինչպես նաև եվրոպական տարածաշրջանի երկրների իրավապահ մարմինների ղեկավարները։
Ներքին գործերի նախարարությունը նշում է, որ Վրաստանում նման մասշտաբի միջազգային ոստիկանական միջոցառման անցկացումը զգալիորեն կնպաստի իրավապահ ոլորտում գործընկերային հարաբերությունների հետագա ամրապնդմանը։
