Ախալքալաք-Կարս երկաթուղին բաց է դեպի Հայաստան արտահանման և ներմուծման համար, սոցիալական ցանցերում հայտարարել է ՀՀ վարչապետ Նիկոլ Փաշինյանը։
Փաշինյանը հայտարարել է, որ Հայաստանն այժմ կկարողանա Վրաստանի միջոցով առևտրային մատակարարումներ իրականացնել դեպի Թուրքիա և Եվրամիություն։ Նա այս իրադարձությունը որակել է որպես շատ կարևոր քայլ հայկական տնտեսության համար։
«Ուրախ եմ հայտարարել, որ Ախալքալաք-Կարս երկաթուղին, ինչպես Ադրբեջանի երկաթուղին, այժմ բաց է Հայաստանից արտահանման և Հայաստան ներմուծման համար։ Սա նշանակալի իրադարձություն է մեր երկրի տնտեսական կյանքում։ Շնորհակալություն եմ հայտնում մեր թուրք և վրացի գործընկերներին»։
Փաշինյանը հայտարարել է նաև, որ այսօր Հայաստանը երկաթուղային կապեր ունի Ռուսաստանի հետ՝ Վրաստանի և Ադրբեջանի միջոցով, ինչպես նաև Չինաստանի հետ՝ Ռուսաստանի և Ղազախստանի միջոցով։ Այժմ՝ Վրաստանի և Թուրքիայի միջոցով, այն կապեր ունի Եվրամիության հետ։ Մոտ ապագայում կբացվեն Նախիջևանի միջոցով անցնող Հայաստան-Թուրքիա, Հայաստան-Ադրբեջան, ապա՝ Հայաստան-Իրան երկաթուղիները։ Մենք շուտով ականատես կլինենք այս իրադարձություններին:
Հարկ է նշել, որ մայիսի 18-ին Բաքու այցելող Վրաստանի վարչապետ Իրակլի Կոբախիձեն հայտարարել էր, որ բոլոր մանրամասները համաձայնեցված են, և Բաքու-Թբիլիսի-Կարս երկաթուղային հատվածը շուտով կգործարկվի։ Նա նաև հավելել, որ «Վրացական երկաթուղիները» կապահովեն անխափան սպասարկում Վրաստանում։
«Ադրբեջանական կողմի հետ կստեղծվի համատեղ ձեռնարկություն, և այս նախագիծը շատ կարևոր է մեր տրանսպորտային ենթակառուցվածքների ամրապնդման առումով», — մայիսի 18-ին ասել է Կոբախիձեն։
