Վրացի ֆերմերները տագնապ են բարձրացնում. ապրիլյան ցրտահարությունները կարող են երկիրը թողնել առանց որոշ սեզոնային մրգերի և հատապտուղների։ Այս մասին հայտարարել է գյուղատնտես և ֆերմեր Ակակի Ղլոնտին՝ մեկնաբանելով իրավիճակը շարունակական գների բարձրացման պայմաններում։
Վերջինիս խոսքով՝ կտրուկ ցրտերը տեղի են ունեցել ակտիվ վեգետացիոն շրջանում, երբ ձևավորվում են բողբոջները և սկսվում է ծաղկումը։ Հենց այս ժամանակ էլ ցրտահարություններն ամենաշատն են վնաս հասցրել։
Գուրիայի ցածրադիր շրջանները տուժել են ամենից շատը։ Մի քանի բնակավայրերում կիվիի բերքը գրեթե ամբողջությամբ ոչնչացվել է։ Օրինակ՝ Օզուրգեթի մունիցիպալիտետում, նշում է Ղլոնտին, այս տարի գրեթե կիվի չի լինի հավաքելու համար. ցրտահարությունը վնասել է ծաղիկները, ինչը նշանակում է, որ պտուղները չեն ձևավորվի։
Միայն մի քանի ավելի տաք շրջաններում, ինչպիսին է Զեմո Նաթանեբին, մասամբ պահպանվել է բերքը։
Կիվիից բացի, ցրտից լուրջ վնաս են կրել հետևյալ մշակաբույսերը՝ արքայանարինջը, թուզը, դեղձը, սալորը և տղեմալին։
Գյուղատնտեսի խոսքով՝ ծաղկման և աճի փուլերում շատ մշակաբույսեր գրեթե ամբողջությամբ ոչնչացվել են։ Հատկապես ծանր էր վիճակը տղեմալիի համար, որը Վրաստանում ամենատարածված սեզոնային մշակաբույսերից մեկն է։
Գյուղատնտեսները զգուշացնում են, որ գարնանային ցրտահարությունների հետևանքները կարող են հանգեցնել ոչ միայն որոշակի մրգերի պակասի, այլև տեղական արտադրանքի գների հետագա աճի։
