Վրաստանի վարչապետ Իրակլի Կոբախիձեն կմասնակցի Եվրոպական քաղաքական համայնքի 8-րդ գագաթնաժողովին, որը հյուրընկալում է Հայաստանը: Այս մասին հաղորդում է կառավարության աշխատակազմի մամուլի ծառայությունը։

Նրանց փոխանցմամբ՝ Իրակլի Կոբախիձեն ելույթ կունենա կլոր սեղանի շուրջ, որի հիմնական թեման է կապի ամրապնդումը և տնտեսական անվտանգությունը։

Այցի շրջանակներում Իրակլի Կոբախիձեն կմասնակցի Եվրոպական քաղաքական համայնքի 8-րդ գագաթնաժողովի բացման լիագումար նիստին, ինչպես նաև կմասնակցի թմրանյութերի դեմ պայքարի եվրոպական կոալիցիայի (ECAD) երկրորդ հանդիպմանը՝ տարբեր երկրների ղեկավարների հետ միասին։

Կառավարության ղեկավարը կմասնակցի նաև պաշտոնական ընդունելությանը, որը կկայանա Հայաստանի Հանրապետության նախագահ Վահագն Խաչատրյանի և վարչապետ Նիկոլ Փաշինյանի անունից՝ ի պատիվ Եվրոպական քաղաքական համայնքի 8-րդ գագաթնաժողովին մասնակցող առաջնորդների։

Վարչապետը Երևան է մեկնել պատվիրակության հետ, որի կազմում են Վրաստանի փոխվարչապետ և արտաքին գործերի նախարար Մակա Բոճորիշվիլին և կառավարության աշխատակազմի ղեկավար Լևան Ժորժոլիանին։