Ախալքալաք-Կարծախ միջազգային ճանապարհը, որը վերջին հինգ տարիների ընթացքում գտնվում է ծայրահեղ վատ, որոշ տեղերում անանցանելի վիճակում, ու ինչն առաջացնում էր ինչպես տեղացիների, այնպես էլ բեռնատարների վարորդների դժգոհությունը, վերջապես սկսել են վերականգնել։
Ախալքալաք -Կարծախ ճանապարհի ընդհանուր երկարությունը մոտավորապես 30 կմ է։
Չնայած այն հանգամանքին, որ չորս տարի է Վրաստանի ճանապարհային վարչությունը խոստանում էր վերականգնել այս ճանապարհը, աշխատանքները հետաձգվում էին, և ճանապարհի վիճակը տարեցտարի միայն վատթարանում էր։
Ճանապարհի, 2010 թվականին, բացումից վեր այնտեղ որևէ խոշոր վերանորոգում չի իրականացվել, սահմանափակվել են փոսային նորոգմամբ և առանձին խոշոր հատվածների ասֆալտապատմամբ։
2022 թվականին Վաչիան գյուղում վերանորոգվել է, ամրացվել է հիմքը, մոտ 1 կիլոմետր երկարությամբ հատված, որն այս միջազգային ճանապարհի մի մասն է կազմում։ Սակայն այս հատվածն ևս արդեն վերանորոգման կարիք ունի։
Անցյալ տարի ասֆալտապատվել է Կարծախ գյուղից մինչև «Կարծախ»-ի մաքսային անցակետ տանող հատվածը։ Ճանապարհը լավ վիճակում է, սակայն ճամփեզրերը և հարակից տարածքները չեն բարեկարգվել։ Սակայն պետք է նշել, որ այս ճանապարհը դեռևս հանձնված չի կառուցապատողի կողմից։
Այս տարի վերականգնողական աշխատանքները սկսվել են միանգամից երկու հատվածներում։
Առաջին հատվածը ձգվում է Դադեշ գյուղից մինչև Վաչիան գյուղի սկիզբը։ Այստեղ ճանապարհի մոտ 1 կիլոմետրն արդեն ծածկվել է խճաքարով, պատրաստվել ասֆալտապատման, իսկ մնացած մասում ճանապարհի ծածկույթն ամբողջությամբ հանվել է մինչ գետանհող։
Ապրիլի 8-ի դրությամբ, ժամանակավոր, աշխատանքները դադարեցվել էին, սակայն տեխնիկան տեղում էր։
Երկրորդ հատվածը Վաչիան գյուղից մինչև Ախալքալաքի բերդն է։ Այստեղ ճանապարհը նույնպես մաքրվել է մինչև հիմքը, իսկ անհրաժեշտության դեպքում լրացուցիչ ամրացումներ են իրականացվում։ Աշխատանքներն իրականացնում է ՍՊԸ «Ճանապարհաշինության թիվ 1 վարչություն»- ը։
Ինչպես նշեց «Ճանապարհաշինության թիվ 1 վարչության» աշխղեկ Էդիկ Միքայելյանը.
«Ներկայումս այն հատվածներում, որտեղ անհրաժեշտ է հիմքի ամրացում, մենք հեռացնում ենք գետնահողը և լցնում խճաքարով։ Հիմքի ամրացման աշխատանքներն ընթացքի մեջ են։ Հուսով ենք աշխատանքներն ավարտել տարեվերջին։ Այն սկսել ենք մոտ մեկ շաբաթ առաջ»։
Նրա խոսքով, բնակավայրերում նախատեսվում է մայթեր կառուցել, մինչդեռ ճանապարհի մյուս հատվածները կլինեն առանց դրանց։
Նշենք, որ վրաց-թուրքական սահման տանող Ախալքալաք-Կարծախ միջազգային ճանապարհը մի քանի տարի շարունակ պարբերաբար անանցանելի է եղել։ Այս տարի գործընթացը տեղից շարժվել է, և վերականգնողական աշխատանքները վերջապես սկսվել են։
Մնում է հուսալ, որ նշված ժամկետները կպահպանվեն, իսկ աշխատանքները կկավարտվեն որակով, որպեսզի ճանապարհը կարճ ժամանակ անց չվերադառնա իր նախկին անանցանելի վիճակին։
«Փոսեր ճանապարհի փոխարեն»՝ Ախալքալաք-Կարծախ մայրուղին կրկին սկանդալի էպիկենտրոնում է
