Վրաստանի դատախազությունը մեկ անձ է ձերբակալել լրագրողի մասնագիտական գործունեությանը ապօրինի խոչընդոտելու և բռնություն կիրառելու սպառնալիքի փաստով։

Դատախազության տեղեկությամբ՝ Կախեթիի շրջանային դատախազության կողմից իրականացված քննությամբ պարզվել է, որ ընթացիկ տարվա մարտի 26-ին Թելավիի մունիցիպալիտետի Քուրդգելաուրի գյուղում ձերբակալված անձը թույլ չի տվել «Ռուստավի 2» հեռուստաընկերության լրագրողին և օպերատորին կատարել իրենց մասնագիտական պարտականությունները և, բռնություն կիրառելու սպառնալիքով, ստիպել է դադարեցնել տեսանկարահանումն ու հեռուստատեսային սյուժեի տարածումը։

«Ձերբակալվածին մեղադրանք կառաջադրվի Վրաստանի քրեական օրենսգրքի 154-րդ հոդվածի 2-րդ մասով (լրագրողի մասնագիտական գործունեության իրականացմանը ապօրինի խոչընդոտում՝ բռնության սպառնալիքով), որը նախատեսում է մինչև երկու տարի ժամկետով ազատազրկում։

Դատախազությունը օրենքով սահմանված ժամկետում դատարան կդիմի՝ մեղադրյալի նկատմամբ խափանման միջոց ընտրելու միջնորդությամբ», — նշվում է տեղեկատվության մեջ։