Երեկ՝ մարտի 11-ին, Ախալքալաքի մունիցիպալիտետի Զակ գյուղում տեղի ունեցավ խաչի բացման և օրհնության արարողություն։
Այս գաղափարի նախաձեռնողներն ու իրականացնողները հենց գյուղի բնակիչներն էին։ Զակ գյուղում քաղաքապետի ներկայացուցիչ Ռոման Սնխչյանի խոսքով, խաչի տեղադրման համար միջոցները հավաքել է ամբողջ գյուղը, ով ինչքան կարողացել է նվիրաբերել է։ Մետաղյա խաչի վրա ծախսվել է մոտ 60 000 լարի։ Խաչը պատրաստել է Զակ գյուղի բնակիչներից մեկը։
Մեծ մետաղյա խաչը տեղադրվել է գյուղի մոտ գտնվող փոքրիկ բլրի վրա։
Բացման արարողությանը ներկա էին տեղական ինքնակառավարման մարմինների ներկայացուցիչներ, գյուղի բնակիչներ և հյուրեր։
Կարմիր ժապավենը կտրեցին Զակ գյուղի եկեղեցու կնքահայր Կարապետ Յորդանյանը և Զակ գյուղում քաղաքապետի ներկայացուցիչ Ռոման Սնխչյանը։
Խաչը օրհնեց քահանա Տեր Դավիթ Կյուրեղյանը։
Հանդիսավոր արարողությունը վարեց Մանվել Օքրոյանը։
Խաչի օրհնությունից հետո բլրի վրա, որտեղ տեղադրվել էր բեմ, տեղի ունեցավ համերգ: Ելույթ ունեցան «Ջավախք» համույթը, աշուղական դպրոցի սաները և աշուղ Ալիք Ջավախքը: Միջոցառմանը ելույթ ունեցավ նաև Հայաստանից հրավիրված ազգագրական երգերի երգահան և երգիչ Խաչիկ Արենցին:
