Այսօր՝ մարտի 11-ին Իլիայի պետական համալսարանի դիմաց էին հավաքվել Վրաստանի էթնիկ փոքրամասնությունների ներկայացուցիչներ, ովքեր դեմ են կրթական բարեփոխումներին: Նրաց կարծիքով, այսպես կոչված բարեփոխումները ուղիղ կերպով ազդում են նրանց կրթություն ստանալու իրավունքի վրա:

Էթնիկ փոքրամասնությունների ուսանողները, ծնողները, ուսուցիչները և քաղաքացիական հասարակության անդամները հայտարարել են, որ բարձրագույն կրթության ոլորտում ընթացող բարեփոխումները և 1+4 ծրագրի ապագայի վերաբերյալ անորոշությունը «սպառնում են հազարավոր էթնիկ փոքրամասնությունների ուսանողների կրթության իրավունքին»։

Ազգային փոքրամասնությունների ներկայացուցիչները պահանջում են 1+4 ծրագրի լիակատար պահպանում, Իլիայի պետական ​​համալսարանի ակադեմիական ինքնավարության և անկախության պաշտպանություն, ինչպես նաև 2025-2026 ուսումնական տարում ընդունված մինչև 500 ազգային փոքրամասնությունների ուսանողների կրթության իրավունքի ապահովում։

Հայտարարությունում մասնավորապես նշվում է,
«Էթնիկ փոքրամասնությունների ներկայացուցիչների կրթության իրավունքի խախտումը հակասում է Վրաստանի Սահմանադրությանը, մարդու իրավունքների սկզբունքներին և միջազգային պարտավորություններին։ Հայտնի է, որ 2025-2026 ուսումնական տարում Իլիայի պետական ​​համալսարանում ընդունվել է մինչև 500 էթնիկ փոքրամասնությունների ներկայացուցիչ։ Այս ուսանողները ներկայումս գտնվում են նախապատրաստական ​​փուլում և պետք է սովորեն իրենց բակալավրի աստիճանի առաջին կուրսում հաջորդ ուսումնական տարում։ Այս երիտասարդներից յուրաքանչյուրը ցանկանում է ուսանող լինել Իլիայի պետական ​​համալսարանում։ Նաև հարկ է նշել, որ նախատեսված բարեփոխումը կազդի ոչ միայն մեկ համալսարանի, այլև երկրի այլ համալսարանների հազարավոր ուսանողների ապագայի վրա

Այս առումով կարևոր հարցեր են առաջանում.

• Ո՞ր համալսարաններում և ինչպե՞ս ենք շարունակելու մեր ուսումը հաջորդ տարի։ Նոր բարեփոխման վերաբերյալ որոշումը սահմանափակվում է միայն ընդհանուր տեղեկատվությամբ։
• Ինչպե՞ս են ապահովվելու մեր իրավունքներն ու կրթական հնարավորությունները։
• Ի՞նչ ազդեցություն կունենա 1+4 ծրագրի կրճատումը ապագա դիմորդների ապագայի վրա։

Մենք հայտարարում ենք, «1+4» ծրագիրը կարևոր է ազգային փոքրամասնությունների երիտասարդների համար բարձրագույն կրթության հասանելիությունն ապահովելու համար: Այս ծրագրի կրճատումը կմեծացնի սոցիալական անհավասարությունը և լրջորեն կվնասի ազգային փոքրամասնությունների ուսանողների ինտեգրման գործընթացին», — ասվում է հայտարարության մեջ։

Նշենք, որ կրթական բարեփոխումների ծրագրում Իլիայի պետական համալսարանում շատ սահմանափակումներ են նախատեսվում: Համեմատելով անցած տարիների դիմորդների քանակի հետ, ըստ նախատեսված փոփոխությունների, մի քանի անգամ կրճատվելու է ընդունվող ուսանողների քանակը:

Տեղեկության համար՝ «1+4» կրթական ծրագիրը պետական ​​ծրագիր է, որը թույլ է տալիս էթնիկ փոքրամասնությունների ներկայացուցիչներին ստանալ բարձրագույն կրթություն արտոնյալ պայմաններով։ Այն ներառում է վրացերենի մեկամյա նախապատրաստական ​​ծրագիր, որը նպաստում է պետական ​​լեզվի յուրացմանը և հասարակության մեջ ինտեգրմանը։

«Վրացական երազանքի» կրթական բարեփոխումների արդյունքում պետական ​​համալսարաններում էթնիկ փոքրամասնությունների համար նախատեսված տեղերը նվազում են։

Այսօր էթնիկ փոքրամասնությունների ուսանողների 85%-ը բաշխված է Թբիլիսիի չորս բազմապրոֆիլ համալսարանների միջև (Թբիլիսիի պետական, Իլիայի պետական, Վրաստանի տեխնիկական և Սոխումիի համալսարաններ)։