Կոտրված ճոճանակներ, նստարաններ, լապտերասյուներ, չորացած ծառեր և ծաղիկներ Ախալքալաքի զբոսայգիներում հաճախ կարելի է տեսնել։ Որոշ դեպքերում վանդալիզմի և հասարակական կարգի խախտման հետևանքները վերանորոգվում են զբոսայգու շինարարների կողմից երաշխիքային ժամկետում, սակայն հաճախ նման վնասումները մնում է երկար ժամանակ՝ թողնելով վերահսկողության և պատշաճ խնամքի բացակայության տպավորություն։
Խաս Բախչա զբոսայգու վերջին վերականգնման ընթացքում՝ 2021 թվականին, տեղադրվել են նոր նստարաններ՝ «Ախալքալաք» գրությամբ։ Այս նստարաններն անընդհատ տեղափոխվում են մեկ վայրից մյուսը։ Վերջերս «Ախալքալաք» գրությունը անհետացել է դրանցից մի քանիսի վրայից։ Ախալքալաքի քաղաքապետարանի վերահսկողության ծառայության տվյալներով՝ նման միջադեպերը գրանցվում են, իսկ մունիցիպալ գույքին հասցված վնասի հետաքննության համար պատասխանատու է ոստիկանությունը։ Տեղական իշխանությունները նշում են, որ նման գործողություններում ամենից հաճախ ներգրավված են դեռահասները։ Դեռահասներին հաճախ մեղադրում են նաև ճոճանակները կոտրելու մեջ։ Սակայն, քանի որ մեղավորներն անչափահասներ են, վնասված գույքի համար ոչ ոք պատասխանատվության չի ենթարկվում, չնայած որ զբոսայգու պահպանման և վերականգնման համար մունիցիպալ բյուջեից զգալի ծախսեր են արվում։ Վնասի մեկ այլ հնարավոր պատճառ կարող է լինել անորակ աշխատանքը և շինանյութերը, ինչպիսիք են տեղադրված փողոցային լապտերները, պլաստմասսայից ճոճանակները և նստարանների բարակ փայտե մասերը։
Այս ամենը տեղի իշխանություններին բերեց այն եզրակացության, որ զբոսայգիները մշտական խնամքի կարիք ունեն: Այս հարցը քննարկվել է Ախալքալաքի սակրեբուլոյի վերջին նիստում: Ախալքալաքի սպասարկման կենտրոնը զբաղվում է մանր վերանորոգումներով, չնայած նրանց կատարած շատ աշխատանքներ իրենց պարտականություններից դուրս են: Նիստի ընթացքում պատգամավորները առաջարկեցին, որ Ախալքալաքի քաղաքապետարանը վարձի առանձին աշխատակիցներ սպասարկման կենտրոնի համար՝ զբոսայգիները խնամելու համար: Չնայած այս հարցը պարբերաբար բարձրացվում է 2024 թվականից ի վեր, այն մինչ օրս մնացել է միայն նիստերի քննարկման թեմայի կարգավիճակում:
Ախալքալաքի սպասարկման կենտրոնի տնօրեն Մխիթար Ռստակյանի խոսքով՝ զբոսայգիների խնամքի համար հատուկ աշխատակիցների անհրաժեշտությունը անխուսափելի է և դա չի կարելի հետաձգել:
«Քաղաքապետարանը մեզ ծանուցում է ուղարկում, որ կոնկրետ վայրում ինչ-որ բան վնասված է և դա անհրաժեշտ է վերանորոգել։ Մենք դուրս ենք գալիս և կատարում ենք աշխատանքը. եթե էլեկտրիկ է պետք, ուղարկում ենք էլեկտրիկի, եթե նստարան է կոտրված, ապա վերանորոգում ենք այն։ Առաջիկա օրերին մենք նախատեսում ենք վարձել նոր աշխատակիցներ, ովքեր կհետևեն զբոսայգիների վիճակին։ Նրանք ոչ միայն կհետևեն տարածքը, այլև կջրեն բույսերը, կտնկեն ծաղիկներ և ծառեր։ Դրա համար մեզ անհրաժեշտ է վարձել չորս մարդ։ Օրինակ՝ մեկ աշխատակից պատասխանատու կլինի 15-րդ զինվորական ավանի զբոսայգիների և ոստիկանության մոտի զբոսայգու համար և այլն, մեկական մարդ մոտակայքում գտնվող երկու զբոսայգիների համար։ Այսպիսով, մենք կկարողանանք ավելի լավ վերահսկել իրավիճակը։ Հավանաբար, այս հարցը կներկայացնենք ամսվա վերջին կայանալիք Սակրեբուլոյի նիստում։ Մինչ այդ ես պետք է այս առաջարկով դիմեմ քաղաքապետարանին»։
Լրացուցիչ անձնակազմ վարձելու որոշումը ներկայումս քննարկման փուլում է։ Այնուամենայնիվ, դատելով ստեղծված իրավիճակից, զբոսայգիների ենթակառուցվածքները լավ վիճակում պահելը դժվար կլինի առանց մշտական խնամքի և վերահսկման։
