Վրաստանի էներգետիկայի և ջրամատակարարման կարգավորման ազգային հանձնաժողովը (GNERC) նախատեսում է էլեկտրաէներգիայի սակագինը վերջնականապես հաստատել այս ամսվա վերջ: Ինչպես լրագրողներին հայտնել է կարգավորող մարմնի նախագահ Դավիթ Նարմանիան, անցյալ տարվա դեկտեմբերին սահմանված սակագինը ժամանակավոր է եղել, քանի որ որոշ պարամետրեր պահանջում էին լրացուցիչ ուսումնասիրություն։
«Անցյալ տարվա դեկտեմբերին կարգավորող մարմինը սահմանեց էլեկտրաէներգիայի ժամանակավոր սակագին, քանի որ որոշ պարամետրեր պահանջում էին ճշտումներ։ Այս պարամետրերը ներկայումս վերջնականապես լրամշակվում են»,-ասել է GNERC-ի նախագահը։
Նրա խոսքով՝ սակագնային փոփոխությունների վերաբերյալ որոշումը կհրապարակվի ամսվա վերջին, չնայած ներկայումս հայտնի չէ՝ արդյոք սպառողների համար գինը կբարձրանա։
«Ինձ համար դժվար է կոնկրետ ասել, թե ինչ տեղի կունենա սակագնի հետ և որքանով այն կբարձրանա, քանի որ համապատասխան աշխատանքները դեռ շարունակվում են»,-բացատրել է Դավիթ Նարմանիան։
Հարցին, թե արդյոք սակագինը իսկապես կվերանայվի մինչև ամսվա վերջ, Դավիթ Նարմանիան հաստատել է, որ հանձնաժողովը որոշում կկայացնի նշված ժամկետներում։
Անցյալ տարի Էներգետիկայի և ջրամատակարարման կարգավորող հանձնաժողովը (GNERC) մի քանի ամիս հայտարարում էր էլեկտրաէներգիայի գների բարձրացման մասին՝ հենվելով ենթակառուցվածքների զարգացման վրա: Ավելի ուշ՝ դեկտեմբերին, Էներգետիկայի և ջրամատակարարման կարգավորման ազգային հանձնաժողովը որոշեց պահպանել էլեկտրաէներգիայի գործող սակագները երեք ամսով:
Աղբյուրը՝ bizzone.info
