Այսօր՝ մարտի 6-ին, Ախալքալաքում կանանց շնորհավորեցին Կանանց միջազգային օրվա կապակցությամբ Մշակույթի տանը կազմակերպված տոնական համերգով։ Համերգը տեղի ունեցավ Մշակույթի տան փոքր դահլիճում։ Երեխաները, ովքեր պարում, երգում և նկարում են, իրենց ստեղծագործական աշխատանքներով և տաղանդով շնորհավորեցին իրենց մայրերին և համերգին հրավիրված մյուս կանանց։
Նախասրահում ցուցադրվեց Ախալքալաքի գեղարվեստի դպրոցի երիտասարդ նկարիչների աշխատանքների ցուցահանդեսը։ Աշխատանքների շարքում առանձնանում էր Շուշանիկ Իրիցյանի աշխատանքները. նրա նկարներից հանդիսատեսին են նայում կատուներին գրկած աղջիկներ։ Ահա, թե ինչպես է երիտասարդ նկարչուհին բացատրում իր աշխատանքների իմաստը.
«Իմ աշխատանքներն ունեն տարբեր փիլիսոփայական իմաստներ։ Դրանցում կատուն հանգստության և պաշտպանողական ուժի խորհրդանիշ է։ Կատուները նաև ներքին ուժի աղբյուր են և դրա մարմնավորում», — ասում է Շուշանիկ Իրիցյանը։
«Կանանց միջազգային օրը միակ տոնն է, որը միավորում է բոլոր մայրցամաքներն ու մշակույթները՝ անկախ լեզվից կամ կրոնից։ Կանայք կապված են կյանքի, սիրո և հույսի հետ ամբողջ աշխարհում։ Ահա թե ինչու մարտի 8-ը դարձել է տոն բոլորի համար», — համերգն այս խոսքերով բացեցին հաղորդավարները հայերեն և վրացերեն լեզուներով։
Բեմում ելույթ ունեցան Ախալքալաքի աշուղական դպրոցի դհոլի անսամբլի սաները, Մշակույթի տան «Ջավախք» և «Մուրջի» պարային համույթները, ինչպես նաև Մշակույթի տան մենակատարները։
Համերգին ներկա էին Ախալքալաքի քաղաքապետ Մելքոն Մակարյանը և սակրեբուլոյի նախագահ Ռուբեն Պալյանը, ինչպես նաև մունիցիպալ տարբեր հաստատությունների ներկայացուցիչներ, ինչպես նաև Ախալքալաքի մունիցիպալիտետի սակրեբուլոյի անդամներ։
Համերգն փակվեց Մշակույթի տան համույթների երեխաների կողմից, ովքեր ելույթ ունեցան բեմում, ներկա գտնվող կանանց մունիցիպալ իշխանությունների կողմից տրամադրված վարդերը նվիրելով։ Սակրեբուլոյի նախագահ Ռուբեն Պալյանը նույնպես բեմից շնորհավորեց կանանց տոնի կապակցությամբ։
«Մեր երեխաները մեզ իսկապես գեղեցիկ պահ պարգևեցին։ Մինչ աշխարհը քաոսի մեջ է, իսկ լրատվական դաշտը լի է պատերազմի մասին խոսակցություններով, մենք մի պահ մոռացանք դրա մասին և մի պահ անցկացրինք մշակույթի աշխարհում։ Ես շնորհակալ եմ կազմակերպիչներին և մեր բոլոր տաղանդավոր երեխաներին։ Օգտվելով առիթից՝ շնորհավորում եմ մեր կանանց՝ մայրերին և քույրերին՝ այս տոնի կապակցությամբ։ Սիրելի՛ կանայք, մաղթում եմ ձեզ երջանկություն և առողջություն։ Սիրելի՛ կանայք, ապրեք ուրախությամբ»,-իր ելույթում ասաց Ռուբեն Պալյանը։
