Վրաստանի կառավարության որոշմամբ՝ երկրում ուժի մեջ կմտնի «Շների հիպերպոպուլյացիայի կառավարման 2026 թվականի ծրագիրը»: Նախագիծն իրականացնելու է Սննդամթերքի ազգային գործակալությունը՝ Տարածքային զարգացման նախարարության և տեղական ինքնակառավարման մարմինների ներգրավմամբ։
Ծրագրի նպատակը կենդանիների հետագծելիության ապահովումն ու կատաղության կանխարգելումն է, ինչը, գերատեսչության պարզաբանմամբ, կրիտիկական նշանակություն ունի ինչպես կենդանիների, այնպես էլ մարդկանց առողջության և անվտանգության պաշտպանության համար։
Սննդամթերքի ազգային գործակալությունը երկրի ողջ տարածքում (բացառությամբ ինքնակառավարվող քաղաքների) աշխատելու է մի քանի ուղղություններով.
Կիրականացվի կատաղության դեմ պատվաստում, կենդանիները կգրանցվեն միասնական բազայում միկրոչիպավորման միջոցով, իսկ էգ շները կստերիլիզացվեն:
Բացի Թբիլիսիից և Աջարիայից, շրջաններում կկատարվեն կենդանիների պատվաստում, նույնականացում և ամորձատում/ստերիլիզացում:
Ծրագրի շրջանակներում անտուն կենդանիներին, ըստ տարածաշրջանների, կտեղափոխեն Թբիլիսիի, Գուրջաանիի, Գորիի և Քութաիսիի մունիցիպալ կացարաններ։
Բացի գործող ենթակառուցվածքներից, Տարածքային զարգացման նախարարության աջակցությամբ, նոր մունիցիպալ կացարանների շինարարություն է պլանավորվում հետևյալ շրջաններում՝ Քվեմո Քարթլի, Սամեգրելո-Զեմո Սվանեթի, Սամցխե-Ջավախեթի:
Սննդամթերքի ազգային գործակալությունը բնակչությանը կոչ է անում համագործակցել և խնդրում է ակտիվորեն ներգրավվել նույնականացման և գրանցման գործընթացում։ Գործակալության հայտարարության համաձայն՝ սա անհրաժեշտ քայլ է ընտանի կենդանիների առողջության և հասարակական անվտանգության համար։
Հիշեցնե՛նք, որ Վրաստանի կառավարությունն ընդունել է որոշում, ըստ որի՝ շների հիպերպոպուլյացիայի կառավարման նպատակով երկրում երեք տարի ժամկետով մորատորիում է հայտարարվում շների որոշ տեսակների բուծման վրա:
