Երեկվանից ՀՀ վարչապետ Նիկոլ Փաշինյանը իր պատվիրակության հետ պաշտոնական այցով գտնվում է Թբիլիսիում։ Հանդիպման վերաբերյալ հրապարակված տեղեկատվության մեջ հիմնականում խոսվում է բարիդրացիական հարաբերությունների և երախտագիտության մասին։
Այսօր տեղի է ունեցել Տնտեսական համագործակցության միջկառավարական հանձնաժողովի նիստը, որը համանախագահել են Վրաստանի և Հայաստանի վարչապետները: Հանդիպումներ են ունեցել նաև երկու երկրների արտաքին գործերի նախարարները, ինչպես նաև վարչապետները:
Վրաստանի վարչապետի մամուլի ծառայության հաղորդմամբ, անձնական հանդիպման ընթացքում քննարկվել են Վրաստանի և Հայաստանի Հանրապետության միջև ռազմավարական գործընկերության հարցերը, ինչպես նաև երկու երկրների միջև տնտեսական համագործակցության միջկառավարական հանձնաժողովի նիստի օրակարգում ընդգրկված հարցերը:
Կոբախիձեն շնորհակալություն է հայտնել Նիկոլ Փաշինյանին Վրաստանի և Հայաստանի միջև համագործակցության և բարեկամության խորացման գործում նրա անձնական ներդրման համար։
«Մենք ուրախ ենք տարածաշրջանում համագործակցության զարգացման ուղղությամբ շատ դրական միտում տեսնել։ Այսօր միջկառավարական հանձնաժողովի նիստում մենք նաև նշեցինք, որ Հայաստանի և Ադրբեջանի միջև ստորագրվել է պատմական խաղաղության համաձայնագիր։ Այս դրական միտումները շատ լավ հիմք են ստեղծում մեզ համար՝ համատեղ աշխատելու մեր տարածաշրջանում կայունություն ապահովելու և խաղաղություն հաստատելու համար»։
Այս համատեքստում մենք կցանկանայինք ևս մեկ անգամ ընդգծել մեր հանձնառությունը տարածաշրջանում խաղաղության և կայունության խթանմանը։ Այս ուղղությամբ Վրաստանը չի խնայի ոչ մի ջանք։ Ես կցանկանայի առանձնահատուկ նշել մեր երկրների միջև գործընկերության մասին։ Այս գործընկերությունը, բարեկամությունն ու համագործակցությունը իսկապես օրինակելի են, և մեր պարտականությունն է մեր երկրների և ժողովուրդների համար անել հնարավոր ամեն ինչ այս համագործակցությունն ու բարեկամությունն էլ ավելի խորացնելու համար։
«Ամփոփելով՝ ցանկանում եմ շնորհակալություն հայտնել վարչապետ Նիկոլ Փաշինյանին մեր երկու երկրների միջև համագործակցության և բարեկամության զարգացման գործում ունեցած իր անձնական ակնառու ներդրման համար», — նշել է վարչապետը։
Իր հերթին, Փաշինյանը շնորհակալություն հայտնեց Կոբախիձեին Հայաստանի և Ադրբեջանի միջև խաղաղության գործընթացում ունեցած ներդրման համար։
«Ես կցանկանայի շնորհակալություն հայտնել Վրաստանի վարչապետին Հայաստանի և Ադրբեջանի միջև խաղաղության գործընթացին ցուցաբերած անձնական աջակցության համար։ Ես կցանկանայի արտահայտել իմ երախտագիտությունը այն աջակցության համար, որը մենք զգում և տեսնում ենք», — ասել է Հայաստանի վարչապետ Նիկոլ Փաշինյանը իր վրացի գործընկեր Իրակլի Կոբախիձեի հետ համատեղ ճեպազրույցի ժամանակ։
Նրա խոսքով՝ Հայաստանը շնորհակալ է Վրաստանին աջակցության համար։
