Վրաստանի կառավարությունը որոշում է ընդունել, ըստ որի՝ շների հիպերպոպուլյացիայի (գերբնակեցման՝ կենդանիների քանակի անվերահսկելի և չափից շատ աճ) կառավարման նպատակով երկրում երեք տարի ժամկետով մորատորիում է հայտարարվում շների բուծման վրա։ Փաստաթուղթը ստորագրել է «Վրացական երազանք»-ի վարչապետ Իրակլի Կոբախիձեն։

Որոշումն ընդունվել է 2026 թվականի փետրվարի 27-ին և ուժի մեջ կմտնի 2026 թվականի հուլիսի 1-ից։

Մորատորիումի խախտման դեպքում օրինախախտների դեմ նախատեսված է 10 հազար լարի տուգանք։

Փաստաթղթի համաձայն՝ «Ընտանի կենդանիների մասին» Վրաստանի օրենքի հիման վրա մորատորիումը տարածվում է ինչպես պոտենցիալ բարձր ռիսկայնություն ունեցող շների, այնպես էլ այլ կոնկրետ ցեղատեսակների վրա, որոնք, կառավարության գնահատմամբ, հիպերպոպուլյացիայի տեսանկյունից լրացուցիչ կարգավորման կարիք ունեն։

Որոշման մեջ որպես բարձր ռիսկային ցեղատեսակներ ներառված են՝

• Ամերիկյան պիտբուլտերիեր

• Ֆիլա բրազիլեյրո

• Ստաֆորդշիրյան տերիեր

• Արգենտինյան դոգ

• Տոսա ինու

• Կանե կորսո

• Ստաֆորդշիրյան բուլտերիեր

Մորատորիումը կվերաբերի նաև այլ ցեղատեսակների, մասնավորապես՝

• Հասկի

• Մալամուտ

• Լայկա

Համաձայն որոշման՝ երեք տարվա ընթացքում նշված ցեղատեսակների շների բուծումը կարգելվի երկրի ողջ տարածքում։ Մորատորիումի կատարման նկատմամբ վերահսկողություն կիրականացնեն Սննդամթերքի ազգային գործակալությունը և մունիցիպալիտետների լիազորված մարմինները։

Կառավարության պարզաբանմամբ՝ որոշման նպատակն է շների հիպերպոպուլյացիայի կառավարումը և համապատասխան ռիսկերի նվազեցումը։