Բարեփոխումների արդյունքում Ախալքալաքի մասնաշենքում ո՞ր ուղղությունները կպահպանվենանկախ եւ պրոֆեսիոնալ լրատվություն • ինֆորմացիայի վստահելի աղբյուր Ջավախքում

Բարեփոխումների արդյունքում Ախալքալաքի մասնաշենքում ո՞ր ուղղությունները կպահպանվեն

12 Փետրվարի, 2026 • Hnazik Avetisyan Բարեփոխումների արդյունքում Ախալքալաքի մասնաշենքում ո՞ր ուղղությունները կպահպանվեն

Վրաստանի կառավարությունը հաստատել է պետական համալսարաններում ուսանողների ընդունելության նոր քվոտաները, որոնք այսուհետ հիմնվելու են աշխատաշուկայի վերլուծության արդյունքների վրա։ Կրթության, գիտության և երիտասարդության նախարար Գիվի Միկանաձեի հայտարարությամբ՝ բարձրագույն կրթության համակարգում մեկնարկում է լայնածավալ բարեփոխում, որի հիմնական սկզբունքն է «մեկ քաղաք՝ մեկ ֆակուլտետ» մոտեցումը։

Jnews-ը կապ է հաստատել Սամցխե-Ջավախեթիի պետական համալսարանի հետ՝ պարզելու, թե նոր բարեփոխումների շրջանակներում Ախալքալաքի մասնաշենքում ո՞ր ուղղություններն են պահպանվելու։ Սակայն համալսարանից հայտնեցին, որ մասնագիտությունների վերջնական ցանկը դեռ պաշտոնապես հաստատված չէ։ Մանրամասները հայտնի կդառնան առաջիկա օրերին։

Նոր քաղաքականության համաձայն՝ մարզային համալսարաններում՝ Զուգդիդիում, Գորիում, Ախալցիխեում և Թելավում, առաջնահերթություն կտրվի ագրարային ուղղություններին, տուրիզմին և մանկավարժությանը։

Հիշեցնենք, որ նոր մոդելի համաձայն՝ յուրաքանչյուր պետական համալսարան կունենա հստակ մասնագիտական ուղղվածություն՝ հաշվի առնելով իր ավանդական պրոֆիլը։

Թբիլիսիի պետական համալսարանը ուսանողներ կընդունի ճշգրիտ և բնական գիտությունների, հումանիտար գիտությունների (բացառությամբ մանկավարժության), իրավունքի, տնտեսագիտության, բիզնեսի վարչարարության, ինչպես նաև սոցիալական և քաղաքական գիտությունների ուղղություններով։

Տեխնիկական համալսարանը կկենտրոնանա ինժեներատեխնիկական մասնագիտությունների վրա, բժշկական համալսարանը՝ բժշկական ծրագրերի, իսկ Իլիայի համալսարանը՝ մանկավարժության և միջազգային հավատարմագրում ունեցող STEM ծրագրերի վրա։

Սուխումի պետական համալսարանում շեշտը կդրվի ագրարային մասնագիտությունների, վրաց-աբխազական լեզվի և գրականության, ինչպես նաև մանկավարժության վրա։

Մարզային համալսարաններում՝ Զուգդիդիում, Գորիում, Ախալցիխեում և Թելավում, առաջնահերթ կդառնան ագրարային ուղղությունները, տուրիզմը և մանկավարժությունը։

Նախարարի խոսքով՝ աշխատաշուկայի ուսումնասիրությունը ցույց է տվել, որ վերջին տարիներին ընդունելությունը էապես չէր համապատասխանում իրական պահանջարկին։ Օրինակ՝ իրավաբանական ֆակուլտետներում տարեկան ընդունվում էր շուրջ 3 600 ուսանող, մինչդեռ շուկայի պահանջարկը 700 մասնագետից պակաս է։ Նման անհամապատասխանություն արձանագրվել է նաև տնտեսագիտության և սոցիալական գիտությունների ոլորտներում։

Միևնույն ժամանակ, նկատվում է կադրերի պակաս ինժեներատեխնիկական և տեղեկատվական տեխնոլոգիաների ոլորտներում, ինչպես նաև բուժքույրական և մանկաբարձական մասնագիտություններում։

Այս տարվա ընդունելությունը պետական բուհերում կկազմի շուրջ 21 300 ուսանող, ինչը մոտ 2 000-ով ավելի է նախորդ տարվա համեմատ։ Բացի այդ, շուրջ 10 000 ուսանող կընդունվի մասնագիտական ծրագրերում՝ ամբողջությամբ անվճար հիմունքներով։

Բարեփոխման հիմնական նպատակը, նախարարի խոսքով, այն է, որ բարձրագույն կրթությունը համահունչ լինի երկրի տնտեսական զարգացմանն ու աշխատաշուկայի պահանջներին՝ նվազեցնելով ապագա գործազրկության ռիսկերը։

Վերատպման կանոն

Կարդացեք նաև՝