Վրաստանի նախկին վարչապետ Իրակլի Ղարիբաշվիլիի հետ կնքվել է դատավարական համաձայնագիր, որի համաձայն նա դատապարտվել է հինգ տարվա ազատազրկման,- այս մասին տեղեկատվություն է տարածում Վրաստանի դատախազությունը։
Ըստ նրանց՝ Իրակլի Ղարիբաշվիլին պարտավորվել է վճարել մեկ միլիոն լարի տուգանք։
«Վրաստանի դատախազությունը մեղադրյալ Իրակլի Ղարիբաշվիլիի հետ կնքել է դատավարական համաձայնագիր, որի համաձայն նախկին վարչապետը դատապարտվել է 5 տարվա ազատազրկման՝ Վրաստանի քրեական օրենսգրքի 194-րդ հոդվածի 3-րդ մասով նախատեսված հանցագործության համար։
Բացի այդ, որպես լրացուցիչ պատիժ նշանակվել է մեկ միլիոն լարի տուգանք։ Նա նաև կզրկվի հանցավոր գործունեության արդյունքում ստացված և իր բնակարանի խուզարկության ժամանակ առգրավված գումարից։
Իրակլի Ղարիբաշվիլին խոստովանում է կատարած հանցագործությունը և համաձայնվում է մեղքի ճանաչման համաձայնագրի պայմաններին։ Դատարանն արդեն բավարարել է դատախազության միջնորդությունը մեղքի ճանաչման համաձայնագրի վերաբերյալ», – ասվում է դատախազության հայտարարության մեջ։
