2025 թվականը մոտենում է իր ավարտին։ Որոշ առումներով այն հաջողակ էր, որոշ առումներով էլ՝ մարտահրավերներով և դժվարություններով լեցուն։ Այս տարվա ընթացքում տեղի ունեցան մի շարք իրադարձություններ, որոնք անմիջականորեն ազդեցին Ախալքալաքի շրջանի բնակիչների բարեկեցության վրա։ Եղան ինչպես ձախողված, այնպես էլ չիրականացված նախագծեր, ինչպես նաև նախաձեռնություններ, որոնք հույս ներշնչեցին Ախալքալաքում տիրող իրավիճակի և կյանքի որակի բարելավման առումով։

Jnews-ը ընտրել է հինգ իրադարձություն, որոնք անմիջականորեն ազդել են Ախալքալաքի մունիցիպալիտետի բնակիչների կյանքի որակի վրա։

Գազիֆիկացում

Այս տարի SJGC-ն ավարտեց Ախալքալաքի մունիցիպալիտետի հինգ գյուղերի գազաֆիկացումը: Աշխատանքներն արդեն ավարտվել են Աբուլում, Մոդեգամում, Բուզավեթում, Մեծ Սամսարում և Փոքր Սամսարում: 2025 թվականին բնական գազը հասանելի դարձավ 342 բաժանորդի համար: Բարձրալեռ շրջանի հեռավոր գյուղերի գազիֆիկացումը, որտեղ ձմեռը տևում է ավելի քան վեց ամիս, ոչ միայն հարմարավետության հարց է, այլև արժանապատիվ կյանքի, գյուղական բնակչության պահպանման և սահմանամերձ շրջանի զարգացման նախապայման:

Մանկապարտեզներ

Վերանորոգման աշխատանքների պատճառով քաղաքային մանկապարտեզները փակվեցին, իսկ աշխատող քաղաքային նախադպրոցական հաստատությունների ծնողների երեխաները հաճախում են գյուղական մանկապարտեզներ: Մնացած երեխաները՝ ավելի քան 400-ը, զրկվեցին մանկապարտեզ հաճախելու հնարավորությունից՝ տեղերի սահմանափակ լինելու պատճառով: Ախալքալաքի բոլոր երեք նախադպրոցական հաստատությունները փակվել են վերանորոգման պատճառով դեռևս 2024 թվականին, ինչը դժգոհություն առաջացրեց ինչպես քաղաքում, այնպես էլ որոշ գյուղերում գտնվող ծնողների շրջանում:

Մրցութային փաստաթղթերի համաձայն՝ մանկապարտեզների բացումը նախատեսված էր 2025 թվականի փետրվարի սկզբին (թիվ 1 և թիվ 2 մանկապարտեզներ) և ապրիլի սկզբին (թիվ 3): Սակայն, ավարտման ժամկետները հետաձգվել են առնվազն մեկ տարով: Քաղաքի նոր, թվով չորրորդ մանկապարտեզը կառուցվել է, բայց այն դեռևս չի բացվել, չնայած շինարարությունն ավարտվել է այս աշնանը:

Հանգստյան վայրեր

Այս աշնանն ավարտվեց նախկին թիվ 15 զինվորական ավանում նոր զբոսայգու կառուցումը: Նախագծի մրցույթը հայտարարվել էր անցյալ տարվա օգոստոսի 6-ին, որի ընդհանուր արժեքը կազմել էր 1 138 507 լարի: Նախագծի իրականացման ժամկետը երկու տարի էր՝ 300 000 լարի՝ 2024 թվականին և 838 507 լարի՝ 2025 թվականին: Մրցույթի հաղթող է ճանաչվել Ախալցիխեի «Ճանապարհաշինության №2 վարչություն» ՍՊԸ-ն՝ 1 104 352 լարի գնով:

Վերջին մի քանի տարիների ընթացքում Ախալքալաքում վերանորոգվել և կառուցվել է ութ զբոսայգի և պուրակ:

Ճանապարհներ

Վերջին մեկ տարվա ընթացքում Ախալքալաքի մունիցիպալիտետում վերականգնվել են գյուղեր տանող ճանապարհները, այդ թվում՝ ներգյուղական։ Սակայն որոշ ճանապարհներ գրեթե անանցանելի են դարձել։ Վրաց-թուրքական սահման տանող Ախալքալաք-Կարծախ միջազգային մայրուղին մոտ հինգ տարի պարբերաբար գտնվում է անմխիթար վիճակում։

Չնայած վարորդների բազմաթիվ դիմումներին և բողոքներին, ինչպես նաև Ճանապարհների դեպարտամենտի կողմից շուտով վերանորոգումը սկսելու խոստումներին, մայրուղու վիճակը շարունակում է վատթարանալ՝ լուրջ խնդիրներ ստեղծելով ինչպես մոտակա գյուղերի բնակիչների, այնպես էլ միջազգային բեռնափոխադրումների համար։

Հարկ է նշել, որ 2022, 2023 և 2024 թվականներին, ըստ նախկինում հայտարարված մրցույթների, ճանապարհահատվածների վերականգնումն իրականացրել են «ՋավախԱվտոԳզա»-ն և «Արալի»-ն։ Սակայն երկու ընկերությունների աշխատանքի ազդեցությունը նվազագույն է եղել։ Որոշ հատվածներում աշխատանքները կատարվել են խախտումներով կամ ընդհանրապես չեն իրականացվել։ Ճանապարհային դեպարտամենտը խոստացել է, որ խնդրահարույց հատվածները և ամբողջ ճանապարհը կվերանորոգվեն, սակայն իրավիճակը մնում է առանց զգալի փոփոխությունների։

Ախալքալաքի մունիցիպալ տրանսպորտ

Վերջապես, այս տարի, ներքին մունիցիպալ տրանսպորտի գծերի փորձնական շահագործման համար գնված ավտոբուսները նոյեմբերի 19-ին ժամանեցին Ախալքալաք: 2023 թվականի մայիսի 17-ին «Բաց սահմաններ» (Jnews) երիտասարդական խմբի կողմից Ախալքալաքի մունիցիպալիտետի Սակրեբուլոյին ներկայացվեց խնդրագիր, որում բարձրացվում էր քաղաքում և գյուղերում մունիցիպալ տրանսպորտային համակարգ ստեղծելու հարցը՝ Ախալցիխեի օրինակով:

Տեղական իշխանությունները խոստացել էին 2024 թվականի բյուջեում միջոցներ հատկացնել հասարակական տրանսպորտի գնման համար։ Սակայն, ֆինանսավորման բացակայության պատճառով, նախագիծը հետաձգվել էր։ Այս տարի մունիցիպալիտետն ապահովեց միջոցները և հայտարարեց ավտոբուսների գնման մրցույթ։

Համաձայն խնդրագրի վերանայման ընթացքում տեղի ունեցած քննարկումների, իշխանությունները նախատեսում են գործարկել հասարակական տրանսպորտի փորձնական գիծ։ Եթե նախագիծը հաջողված լինի, մունիցիպալիտետը մտադիր է ընդլայնել ցանցը, հակառակ դեպքում ավտոբուսները կօգտագործվեն մունիցիպալիտետի այլ կարիքների համար։