Այս գիշեր Ախալքալաքի մունիցիպալիտետում ուժեղ քամին, ձյունը և ձնաբուքը խոչընդոտել են երթևեկությունը և որոշ տեղերում ամբողջությամբ փակել գյուղական ճանապարհները: Ճանապարհների սպասարկման տեխնիկան աշխատում է տեղում, սակայն անբարենպաստ եղանակային պայմանների պատճառով ճանապարհները կրկին ծածկվում են ձյունով,- հայտնում է քաղաքապետարանը:
«Ջավախ Ավտո Գզա» ընկերությունը մաքրում է գյուղական ճանապարհները ձյունից:
«Մենք հենց նոր զանգ ստացանք Դադեշ գյուղից. տեխնիկան ճանապարհին է: Մենք նաև տեղեկատվություն ստացանք Խորենիա գյուղից: Այժմ մենք սպասում ենք զանգերի այլ գյուղերից. կամ նրանք կկապվեն մեզ հետ, կամ մենք ինքներս կզանգահարենք նրանց: Գիշերը տեխնիկան աշխատել է Դադեշի, Կոմունայի և Ազավրեթի ուղղություններով», — հայտնում են քաղաքապետարանից:
Մեր տեղեկությունների համաձայն, գրեթե բոլոր գյուղական ճանապարհները, եթե ոչ
անանցանելի, ապա դժվարանցանելի են: Քաղաքապետարանից պատասխանատու անձի խոսքով, մունիցիպալիտետում ներկայումս տիրող ձնաբքի պատճառով ձյան մաքրումը անարդյունավետ է մինչև եղանակային պայմանների բարելավումը:
Ախալքալաք-Կարծախ պետական նշանակության ճանապարհը բաց է։
