Ազգային վիճակագրական ծառայության տվյալներով՝ Վրաստանում կենսապահովման նվազագույնի չափը 2025 թվականի նոյեմբերին աճել է հոկտեմբերի համեմատ։
Ըստ «Վրացստատ»-ի՝ աշխատունակ տարիքի տղամարդկանց համար կենսապահովման նվազագույնն այս տարվա հոկտեմբերին կազմել է 282.5 լարի, մինչդեռ նոյեմբերին այս ցուցանիշը աճել է 5 լարի 90 թեթրիով՝ հասնելով 288.4 լարիի: Միևնույն ժամանակ, ըստ «Վրացստատ»-ի, միջին սպառողի կենսապահովման նվազագույնը նոյեմբերին 2025 թվականի հոկտեմբերի համեմատ աճել է 5 լարի 10 թեթրիով՝ հասնելով 255.4 լարիի:
«Վրացստատ»-ը նշում է, որ կենսապահովման նվազագույնը որոշվում է նվազագույն պարենային զամբյուղի հիման վրա, որը ներառում է աշխատունակ տարիքի տղամարդու բնականոն կենսունակության և աշխատունակության համար ֆիզիոլոգիապես անհրաժեշտ սննդի քանակը: Կենսապահովման նվազագույնի պարենային զամբյուղը բաղկացած է 40 սննդամթերքից, այդ թվում՝ հաց, ձավարեղեն, միս, կաթնամթերք, բանջարեղեն և հրուշակեղեն:
