Վրաստանում ներկայացվել է շենքերի և կառույցների գեղագիտական բնութագրերը կարգավորող նոր կանոնակարգի նախագիծ։ Փաստաթուղթը մշակվել է «Վրացական երազանքի» կառավարության ղեկավար Իրակլի Կոբախիձեի նախաձեռնությամբ և մասնավոր հատվածին է ներկայացվել էկոնոմիկայի և կայուն զարգացման նախարարության կողմից։ Գերատեսչության ղեկավար Մարիամ Կվրիվիշվիլին ընդգծել է, որ փաստաթուղթը պետք է հաշվի առնի բիզնես շահերը։
«Կարևոր է, որ շենքերի և կառույցների գեղագիտական բնութագրերի վերաբերյալ նոր կանոնակարգերը լիովին համապատասխանեն մասնավոր հատվածի սպասումներին», — ասել է Մարիամ Կվրիվիշվիլին։
Կվրիվիշվիլիի խոսքով՝ փաստաթղթի վրա աշխատանքները կատարվել են «ճարտարապետների, գեղարվեստական շրջանակների ներկայացուցիչների, շինարարների և մանրածախ առևտրի ցանցերի հետ ակտիվ համագործակցությամբ»։ Նախարարը նշել է, որ նախաձեռնության նպատակն է երկրի բոլոր մարզերում ներդնել քաղաքային և գեղագիտական բարձր չափանիշներ։ Զուգահեռաբար անցկացվում է տարածաշրջանների և քաղաքների ուսումնասիրություն, «որի հիման վրա կպատրաստվի անհատական նախագիծ Վրաստանի յուրաքանչյուր տարածաշրջանի համար»։
«Մենք համոզված ենք, որ այս կանոնակարգի ուժի մեջ մտնելուց հետո պարզ կդառնա, անհամեմատ կբարելավվի մեր երկրի յուրաքանչյուր շրջանի՝ քաղաքի ու գյուղի ճարտարապետական տեսքը», — հավելել է նա։
Էկոնոմիկայի նախարարի առաջին տեղակալ Նինո Էնգուկիձեն բացատրել է, որ նոր պահանջների պահպանումը սկզբում կամավոր կլինի բիզնեսի համար, բայց վեց ամիս անց կդառնա պարտադիր։ Նրա խոսքով՝ առաջնահերթություն կտրվի Վրաստանում արդյունահանվող կամ արտադրվող շինարարական և այլ նյութերին։
«Մեր քաղաքների և ավանների պատմական և մշակութային ինքնության պահպանումը չափազանց կարևոր է։ Պատմականորեն որոշակի շինանյութեր արդյունահանվել են որոշակի տարածաշրջանում, և հենց այդ նյութերն են ձևավորել բնակավայրերի ճարտարապետական տեսքը», — նշել նա։
Նախագծի հեղինակները պնդում են, որ այն պատրաստվել է՝ հաշվի առնելով եվրոպական երկրների, այդ թվում՝ Ֆրանսիայի և Մեծ Բրիտանիայի փորձը։
