Վրաստանի Ներքին գործերի նախարարի հրամանի հիման վրա ստեղծված մշտական հանձնաժողովը ոչնչացրել է աննախադեպ քանակությամբ՝ 926 կիլոգրամ, տարբեր տեսակի թմրանյութեր, որոնք առգրավվել են ապօրինի շրջանառությունից Վրաստանում տարբեր ժամանակներում անցկացված քննչական միջոցառումների արդյունքում, որոնց ընդհանուր արժեքը սև շուկայում գերազանցում է 19 միլիոն լարին։ Այս մասին հաղորդում է Ներքին գործերի նախարարությունը:
Գերատեսչության հաղորդմամբ՝ փորձագետ-քրեագիտական վարչության աշխատակիցները ժամանակակից չափանիշներին համապատասխանող հատուկ բարձր ջերմաստիճանի վառարանում (այրիչ) ոչնչացրել են տարբեր տեսակի թմրանյութեր առանձնապես մեծ քանակությամբ, այդ թվում՝ «կոկաին», «հերոին», «մեթադոն», «ՄԴՄԱ», «Ալֆա-ՊՎՊ», «կետամին», «կլեֆեդրոն», «բուպրենորֆին», «տրամադոլ», «կոդեին», «դիազեպամ» և «մարիխուանա»։ Ինչպես նաև տարբեր հոգեմետ և նոր հոգեակտիվ նյութեր։
«Գործող օրենսդրության համաձայն, թմրանյութերի ոչնչացման գործընթացը, որն իրականացվել է ժամանակակից բնապահպանական չափանիշներին համապատասխան, իրականացվել է Ներքին գործերի նախարարության աշխատակիցների՝ մշտական հանձնաժողովի անդամների, ինչպես նաև գլխավոր դատախազության և աշխատանքի, առողջապահության և սոցիալական պաշտպանության նախարարության ներկայացուցիչների հետ համատեղ։
Հատկանշական է, որ որպես ապացույց առգրավված թմրանյութերը պահվում են միջազգային չափանիշներին համապատասխան հատուկ կահավորված պահեստում։ Քրեական գործերով դրանք ոչնչացվում են դատարանի դատավճռի հրապարակումից հետո», – ասվում է ՆԳ նախարարության տեղեկատվության մեջ։
