Հասարակական տրանսպորտի համար նախատեսված երկու ավտոբուսները մոտ 10 օր է, ինչ կայանված էին Ախալքալաքի կենտրոնում: Գնման մրցույթի հայտարարումից ի վեր լրատվամիջոցները հետաքրքրվում են, թե ինչպես և որտեղ են բաշխվելու ավտոբուսները, դրանց գտնվելու վայրը և այլ մանրամասներ: Այնուամենայնիվ, քաղաքապետարանից վստահեցրել են, որ իրենք բավարար ժամանակ ունեն այս բոլոր հարցերը լուծելու համար:
«Մենք ունենք երեք կամ ավելի ամիս՝ ավտոբուսներն Ախալքալաք հասցնելու համար։ Այդ ժամանակաընթացքում էլ մենք որոշում կկայացնենք։ Մենք ունենք ավտոտնակ, և ավտոբուսներն առայժմ այնտեղ կկայանվեն», — հայտնել են Ախալքալաքի քաղաքապետարանից։
Ավտոբուսները ժամանել են, սակայն հասարակական տրանսպորտի հետ կապված խնդիրները մնում են չլուծված։ Տեղական իշխանությունները քննարկում են հաջորդ տարվա բյուջեն, և պատգամավորները մտահոգություն են հայտնել տրանսպորտի համար հատկացված միջոցների բացակայության վերաբերյալ։ Նրանք նաև մտահոգություն են հայտնել ժամկետների վերաբերյալ, որպեսզի ավտոբուսները չկանգնեն մինչև հունիս կամ հուլիս։ Ի պատասխան՝ քաղաքապետարանի ներկայացուցիչները նիստին տեղեկացրել են, որ քաղաքապետարանի և սակրեբուլոյի հանձնաժողովը համատեղ կսահմանի երթուղիների ուղղությունները, ֆինանսական հարցերը և այլ մանրամասներ՝ հաջորդ տարվա հունվարին։
Հիշեցնենք, որ ներքին մունիցիպալ տրանսպորտային գծերի փորձնական գործարկումն ապահովելու համար գնված ավտոբուսներն Ախալքալաք են ժամանել նոյեմբերի 19-ին, մոտավորապես ժամը 14:30-ին։ Ավտոբուսների գնումն իրականացվել է մրցույթի պայմաններին համապատասխան։ Ախալքալաքի մունիցիպալիտետի քաղաքապետարանը երկու ուղևորատար ավտոբուսների ձեռքբերման մրցույթը հայտարարել էր ապրիլի 17-ին։ Գնման բյուջեն կազմում էր 424 178 լարի։
Հիշեցնենք, որ 2023 թվականի մայիսի 17-ին «Բաց սահմաններ» (Jnews) կազմակերպության երիտասարդական խմբի կողմից Ախալքալաքի մունիցիպալիտետի սակրեբուլո էր ներկայացվել խնդրագիր։ Նրանում խոսվում էր մունիցիպալիտետի քաղաքներում և գյուղերում, օրինակ՝ Ախալցիխեում մունիցիպալ տրանսպորտային ցանց ստեղծելու անհրաժեշտության մասին։
Տեղական իշխանությունները խոստացել էին 2024 թվականի բյուջեում հասարակական տրանսպորտի գնման համար միջոցներ ներառել, սակայն ֆինանսավորման բացակայության պատճառով գնումը ստիպված էին եղել հետաձգել։ Այս տարի մունիցիպալիտետը գտել է միջոցներ, ու ավտոբուսների գնման մրցույթն արդեն հայտարարված է։ Խնդրագրի շուրջ տեղի ունեցած քննարկումների համաձայն, տեղական իշխանությունները մտադիր են մունիցիպալիտետում գործարկել հասարակական տրանսպորտի փորձնական գիծ, ու եթե այն իրեն արդարացնի, ապա մունիցիպալիտետը հետագայում կընդլայնի հասարակական տրանսպորտի ցանցը, իսկ եթե չարդարացնի, ավտոբուսները կօգտագործվեն մունիցիպալիտետի այլ կարիքների համար։
