Վրաստանի քաղաքացիների համար Լեհաստանում պարզեցված աշխատանքային վիզաների դադարեցումը կապված է բացառապես Վարշավայի ներգաղթային քաղաքականության հետ և չի արտացոլում երկու երկրների միջև հարաբերությունների վատթարացումը, — հայտարարել է Վրաստանի խորհրդարանի խոսնակ Շալվա Պապուաշվիլին։
«Մենք նաև բավականին խիստ ներգաղթային քաղաքականություն ունենք, և լեհաստանի քաղաքացիները այստեղ չեն գա միայն աշխատելու համար։ Սրանք նրանց ներքին միգրացիոն խնդիրներն են։ Մենք տեսնում ենք, որ Գերմանիան և այլ երկրներ խստացնում են կարգավորումները և փորձում են վերակառուցել իրենց ներգաղթային քաղաքականությունը», — լրագրողներին ասել նա։
Ընդգծենք, որ 2025 թվականի դեկտեմբերի 1-ից Վրաստանի քաղաքացիներն այլևս չեն կարողանա Լեհաստանում աշխատանքային վիզա ստանալ պարզեցված ընթացակարգով։ Լեհաստանի ընտանիքի, աշխատանքի և սոցիալական քաղաքականության նախարարը նոր կանոնակարգ է հրապարակել օտարերկրացիների աշխատանքի ընդունման պարզեցված ընթացակարգերի վերաբերյալ։
Պարզեցված ընթացակարգերը, այդ թվում՝ օտարերկրացուն աշխատանք վստահելու դիմումը, կկիրառվեն Հայաստանի, Բելառուսի, Մոլդովայի և Ուկրաինայի քաղաքացիների համար։
Նոր կարգավորումը բացառություն է նախատեսում Վրաստանի քաղաքացիների համար, սակայն` որոշակի պայմաններով.
Անցումային դրույթ. Վրաստանի քաղաքացիները, որոնց աշխատանք է վստահվել այս կարգավորման ուժի մեջ մտնելուց առաջ, կարող են դիմումի (oświadczeniu o powierzeniu pracy cudzoziemcowi, գրանցված գրանցամատյանում) հիման վրա շարունակել աշխատել մինչև դիմումի վավերականության ժամկետի լրանալը։
Ընթացիկ գործեր. Հին կարգավորման դրույթները կկիրառվեն այն ընթացակարգերի նկատմամբ, որոնք սկսվել և չեն ավարտվել կարգավորման ուժի մեջ մտնելուց առաջ։
Պաշտոնական վիճակագրության համաձայն՝ 2024 թվականին Լեհաստանում Վրաստանի քաղաքացիներին տրամադրվել է 76 671 աշխատանքային թույլտվություն։
Միգրացիոն կանոնակարգերի խստացումը տեղի է ունենում Վարշավայի և Թբիլիսիի միջև հարաբերություններում առկա խզման ֆոնին։ Լեհաստանի իշխանությունները բազմիցս քննադատել են «Վրացական երազանքի» կառավարությանը՝ եվրոպական ուղղությունից շեղվելու համար։ Ապրիլին Լեհաստանը սահմանափակեց Վրաստանի ութ անվտանգության աշխատակիցների մուտքը երկիր՝ «ընդդիմության նկատմամբ ճնշումների աճին ի պատասխան»։
