Ախալքալաքի մունիցիպալիտետի քաղաքապետարանը պետությանը փոխանցեց Օրջա և Արագվա գյուղերի պոմպակայանները, ինչպես նաև Խանդո գյուղի երկու ջրամբարը։ Այս օբյեկտները հետագայում կսպասարկվեն Միացյալ մելիորացիայի Սամցխե-Ջավախեթիի սպասարկման կենտրոնի կողմից, քանի որ նրանց սպասարկումը չափազանց թանկ է տեղական բյուջեի համար։

նոյեմբերի 24-ին, Սակրեբուլոյի պատգամավորները հաստատեցին գույքի փոխանցումը պետությանը՝ հետագայում Միացյալ մելիորացիայի սպասարկման կենտրոնի հաշվեկշռին փոխանցմամբ։

Փոխանցվել են հետևյալ օբյեկտները՝

• Օրջա գյուղի պոմպակայան՝ տրանսֆորմատորով,

• Արագվա գյուղի պոմպակայան,

• Խանդո գյուղի երկու ջրամբար։

Ախալքալաքի մունիցիպալիտետի Տնտեսական զարգացման, պլանավորման և գույքի կառավարման ծառայության պետ Մնացական Փամբուխչյանը նշեց, որ այս որոշումը կայացվել է գյուղացիների շահերից ելնելով, քանի որ նրանք այս դեպքում կկարողանան օգտվել պետական սուբսիդիաներից։

«Տեղական իշխանությունը չի կարող ստանձնել այս օբյեկտների սպասարկումը, իսկ եթե դրանք փոխանցվեն, գյուղացիները կկարողանան օգտվել սուբսիդիայից. մեկ հեկտարի ոռոգումը կարժենա 75 լարի: Եթե սպասարկումը մնա մունիցիպալիտետի վրա, ծառայությունը զգալիորեն թանկ կլինի։ Հետևաբար, մենք որոշեցինք գործել բնակիչների օգտին: Արագվա գյուղի պոմպակայանը ներկայումս չի գործում և վերանորոգման կարիք ունի: Մենք նաև փոխանցում ենք Խանդոյում նախանցած տարի կառուցած մեր ջրամբարը», — բացատրեց Մնացական Փամբուխչյանը:

Խանդո գյուղի երկու ջրամբարի տարածքը 61 691 քառակուսի մետր է:

Քաղաքապետարանի տվյալներով, երկու տարի շարունակ նրանք առաջարկել են Սամցխե-Ջավախեթիի Միացյալ մելիորացիայի սպասարկման կենտրոնին իրենց հաշվեկշռում ներառել Օրջա և Արագվա գյուղերի պոմպակայանները, բայց այնտեղ հրաժարվել են: Այժմ համաձայնությունը ստացվել է այն պայմանով, որ Խանդոյի երկու ջրամբարը նույնպես փոխանցվեն:

Տեղական իշխանությունները հույս ունեն, որ օբյեկտները Միացյալ մելիորացիային փոխանցելը կնվազեցնի ոռոգման ծախսերը, ինչը, վերջին հաշվով, կնվազեցնի կարտոֆիլի գինը և կբարձրացնի Ջավախքի արտադրանքի մրցունակությունը շուկայում։

Տուրցխ գյուղի ջրամբարները փոխանցվում են «Վրաստանի մելիորացիա» ընկերության հաշվեկշռին