«Transparency International — Georgia» ՀԿ-ի տվյալներով՝ վերջին վեց տարիների ընթացքում գրանցվել է էլիտար կոռուպցիայի 271 հավանական դեպք, որոնցում ներգրավված են «Վրացական երազանքի» ավելի քան 227 ներկայիս կամ նախկին բարձրաստիճան պաշտոնյաներ, այդ թվում՝ կառավարության 38 անդամ, խորհրդարանի 40 անդամ, 18 դատավոր և 72 մունիցիպալ մակարդակի պաշտոնյա։
Կազմակերպության հայտարարության համաձայն՝ էլիտար կոռուպցիան շարունակում է անպատիժ մնալ։
«Միայն 2025 թվականին մենք բացահայտել ենք էլիտար կոռուպցիայի 48 նոր հավանական դեպք։ Հետաքննչական մարմինները, որոնք ամիսներ շարունակ զբաղված էին «Վրացական երազանքի» ներքին կլանային պայքարով, որևէ հետաքրքրություն չեն ցուցաբերել այս դեպքերից որևէ մեկի առնչությամբ։
2025 թվականին բացահայտված էլիտար կոռուպցիայի դեպքերի թվում են հետևյալը՝ պաշտոնյաների կողմից պետական խոշոր պայմանագրերի շնորհում սեփական ընկերություններին և հարազատներին, բյուջետային միջոցների և պետական գույքի բաշխում կլանային բիզնեսներին՝ քաղաքական նվիրատվությունների դիմաց, անհիմն ակտիվների կուտակում և դրանց թաքցնում կամ չհայտարարագրում, պաշտոնյաների համար գաղտնի և արգելված բիզնես գործունեությամբ զբաղվելը, ընտանիքից նվերներ ընդունելով՝ ապօրինի եկամուտների լվացումը, կոռուպցիոն գործարքների միջոցով շինարարական լիցենզիաների ստացումը, անօրինական շինարարությունը, պետական գույքի յուրացումը սեփականաշնորհման միջոցով, բնական պաշարների յուրացումը, որոշակի անձանց օգտին օրենքների ընդունումը, դատավորների վրա ճնշում գործադրելը կամ դատարանների օգտագործումը կոռուպցիոն նպատակներով, նեպոտիզմ և պետական հաշվին կուսակցական ակտիվիստների ֆիկտիվ աշխատանքի ընդունում։
«Վրաստանում ստեղծված իրավիճակը բնութագրվում է, մի կողմից, մանր կոռուպցիայի տպավորիչ ցածր մակարդակով, մյուս կողմից՝ բարձր մակարդակի կոռուպցիայի գրեթե լիակատար անպատժելիությամբ։ Ցավոք, Վրաստանում կոռուպցիան ստացել է «պետական կողոպտման» տեսք։ Բարձր մակարդակի կոռուպցիայի հնարավոր բնույթն ու մասշտաբները, ինչպես նաև դրա աճի տեմպը ենթադրում են, որ այն հասնում է «կլեպտոկրատիայի» մակարդակի։ Դրա ճնշման համար պատասխանատու մարմինները (գլխավոր դատախազությունը և պետական անվտանգության ծառայությունը) անպատասխան են թողնում էլիտար կոռուպցիայի հնարավոր դեպքերը, հատկապես, երբ դրանք ներառում են իշխող կուսակցությանը մոտ կանգնած անձանց», — ասվում է ՀԿ-ի հայտարարության մեջ։
