Որոնողական-փրկարարական աշխատանքները շարունակվում են Վրաստանի Սիղնաղիի մունիցիպալիտետում թուրքական C-130 ռազմական բեռնատար ինքնաթիռի վթարի վայրում։
Երեքշաբթի օրը Ադրբեջանից Թուրքիա ուղևորվող թուրքական ինքնաթիռն անհետացել է ռադարներից Վրաստանի սահմանը հատելուց կարճ ժամանակ անց՝ առանց աղետի ազդանշան հաղորդելու։ Վթարը տեղի է ունեցել պետական սահմանից մոտ հինգ կիլոմետր հեռավորության վրա։
Ինքնաթիռը տեղափոխում էր F-16 կործանիչների մեխանիկական պահեստամասեր, և ինքնաթիռում 20 սպասարկման մասնագետ կար։ Նրանք բոլորը ենթադրաբար մահացած են։
APA-ն պարզաբանում է, որ ինքնաթիռում գտնվող մասնագետները սպասարկում էին նոյեմբերի 8-ին Բաքվում կայացած ռազմական շքերթին մասնակցող F-16 կործանիչները։ APA-ի աղբյուրն ընդգծել է. «Ինքնաթիռում պայթուցիկ նյութեր կամ սարքեր չեն եղել, միայն F-16 ինքնաթիռների պահեստամասեր»։
- Գիշերը դեպքի վայր են ժամանել Վրաստանի Ներքին գործերի և Պաշտպանության նախարարությունների ղեկավարներ Գեկա Գելաձեն և Իրակլի Չիքովանին։ Թուրքիայի, Վրաստանի և Ադրբեջանի պաշտոնյաները մշտական կապի մեջ են։ Գիշերվա ընթացքում բազմաթիվ պաշտոնական ցավակցական հայտարարություններ են տարածվել։
- Թուրքիան Վրաստան է ուղարկել «Akinci» անօդաչու թռչող սարք, որը կմասնակցի կործանման վայրի հետազոտմանը։ Նույն անօդաչու թռչող սարքը 2024 թվականին օգտագործվել է ավիաաղետից հետո Իրանի նախագահական ուղղաթիռը որոնելու համար։
- ԶԼՄ-ները նշում են, որ կործանված ինքնաթիռը շահագործվել է երկար ժամանակ, և դրա վերջին հիմնանորոգումը կատարվել է 2020 թվականին։
▪️Մասնագետները նշում են, որ ինքնաթիռի կորպուսի վրա արտաքին ազդեցության նշաններ չկան։
Ոչ պաշտոնապես, նախնականորեն անվանվել են վթարի հնարավոր պատճառները.
➖օդանավի երկարատև շահագործման հետ կապված տեխնիկական անսարքություն և կորպուսի հնարավոր կոռոզիա, որը թռիչքի ընթացքում բարձր ճնշման տակ կարող էր հանգեցնել կործանման։
➖օդանավի ներքին պահեստամասի վնասում՝ բեռի ոչ պատշաճ ամրացման պատճառով։
Աղբյուրը՝ Newsgeorgia
