Վրաստանի ներքին գործերի նախարարության միգրացիայի դեպարտամենտի աշխատակիցները, նախարարության համապատասխան գերատեսչությունների հետ սերտ համագործակցությամբ, Վրաստանից արտաքսել են 121 օտարերկրյա քաղաքացու։
Ներքին գործերի նախարարության հաղորդմամբ, վերջին մեկ ամսվա ընթացքում ձեռնարկված համալիր միջոցառումների արդյունքում երկրից արտաքսվել են Հնդկաստանի, Իրանի, Թուրքիայի, Պակիստանի, Իրաքի, Եգիպտոսի, Լիբանանի, Մարոկկոյի, Ֆիլիպինների, Հորդանանի, Բանգլադեշի, Չադի, Կոտ Դ’Իվուարի, Ռումինիայի, Ռուսաստանի, Նիգերիայի և այլ երկրների 121 քաղաքացիներ։
Նրանց խոսքով, գործող օրենսդրության համաձայն, արտաքսված անձանց արգելվել է մուտք գործել երկիր։
«Վրաստանի Ներքին գործերի նախարարության միգրացիայի դեպարտամենտը երկրի ներսում անօրինական միգրացիայի դեմ պայքարի համար պատասխանատու մարմինն է։ Դրա լիազորություններից մեկն է Վրաստանում առանց օրինական հիմքերի գտնվող օտարերկրյա քաղաքացիների նույնականացումը և նրանց Վրաստանից արտաքսումն իրականացնելը», – ասվում է Ներքին գործերի նախարարության հայտարարության մեջ։
