Վրաստանի ֆինանսների նախարարության քննչական ծառայության աշխատակիցները ձերբակալել են Վրաստանի մունիցիպալ զարգացման հիմնադրամի նախկին գործադիր տնօրեն Դավիթ Տաբիձեին՝ պաշտոնեական լիազորությունները չարաշահելու համար։
Այս մասին հայտարարվել է Վրաստանի ֆինանսների նախարարության քննչական ծառայությունում կայացած ճեպազրույցի ժամանակ։
Գերատեսչության տվյալներով՝ այս գործով ձերբակալվել են նաև ծրագրի մենեջերը և նույն ծառայության հիմնադրամի նախագծի մենեջերը, որոնք համագործակցել են քննության հետ։ Դատարանը նրանց նկատմամբ որպես խափանման միջոց կիրառել է գրավը։
«Ինչպես հանրությունն արդեն գիտի, «Լաղի Կապիտալի» ՍՊԸ-ի ղեկավարները ձերբակալվել են 30 մանկապարտեզների վերականգնման համար Մունիցիպալ զարգացման հիմնադրամից հատկացված 9 365 801 լարիի խարդախությամբ յուրացման և 1,211,000 լարիի անօրինական եկամուտների լեգալիզացման համար»։
Հետաքննությունը պարզել է, որ նրանք տեղեկություններ են տիրապետել, որ «Լաղի Կապիտալի» ՍՊԸ-ի 2023 թվականի հուլիսից մինչև 2024 թվականի մայիսը ներկայացված կանխավճարի պահանջները անհիմն էին և միայն մասամբ ապահովված։ Այս անձինք, չարաշահելով իրենց պաշտոնեական դիրքը և առավելություն տալու նպատակով, չնայած այն հանգամանքին, որ ընկերության կողմից 2023 թվականի հուլիսին ստացված կանխավճարը չի օգտագործվել իր նպատակային նշանակությամբ, այնուամենայնիվ, 2023-2024 թվականներին «Լաղի Կապիտալի» ՍՊԸ-ին տրամադրել են 11,218,380 լարիի անհիմն կանխավճար՝ մանկապարտեզների վերանորոգման համար, որից «Լաղի Կապիտալի» ՍՊԸ-ի ղեկավարությունը խարդախ ճանապարհով յուրացրել է 9 365 801 լարի։
Հետաքննությունը տարվում է Վրաստանի ՔՕ 332-րդ հոդվածի 1-ին մասով, 180-րդ հոդվածի 2-րդ և 3-րդ մասերով, 194-րդ հոդվածի 2-րդ և 3-րդ մասերով, ինչպես նաև 362-րդ հոդվածի 2-րդ մասով, որոնք նախատեսում են 9-ից 12 տարի ազատազրկում։
Հետաքննությունը շարունակվում է ինտենսիվորեն՝ հանցագործությանը մասնակից այլ անձանց բացահայտելու և համապատասխան արձագանք տալու համար», — նշել է գերատեսչությունը։
Ախալքալաքի երեխաները նույնպես այս հանցագործության զոհն են դարձել, քանի որ Ախալքալաքի թիվ 3 մանկապարտեզն այն մանկապարտեզների շարքում է, որոնք չեն վերանորոգվել: «Լաղի Կապիտալի» ընկերությունը, որի ներկայացուցիչները ձերբակալվել են, 2023 թվականին շահել է Ախալքալաքի թիվ 3 մանկապարտեզի վերանորոգման մրցույթը, բայց այդպես էլ չի ավարտել աշխատանքները: Այս մանկապարտեզը, ինչպես նաև քաղաքի երկու այլ նախադպրոցական հաստատություններ, մեկ տարուց ավելի է, ինչ փակ է վերանորոգման և շինարարության պատճառով, ինչի հետևանքով Ախալքալաքի շատ երեխաներ մնացել են առանց նախադպրոցական կրթության:
