Amnesty International իրավապաշտպան կազմակերպությունը դատապարտել է Թբիլիսիում տեղի ունեցած վերջին իրադարձությունները և քաղաքացիական հասարակության ակտիվիստների ձերբակալությունները ճանապարհը փակելու մեղադրանքով։
Amnesty International-ի Արևելյան Եվրոպայի և Կենտրոնական Ասիայի գծով փոխտնօրենը նշել է, որ ձերբակալություններն «ընդգծում են Վրաստանում բռնաճնշումների աճող միտումը»։
Նա ասել է, որ «Վրացական երազանք» կուսակցությունը, կարծես, վճռականորեն տրամադրված է «լռեցնել խաղաղ ցուցարարներին սպառնալիքների և պատժի միջոցով»։
«Ձերբակալություններն ընդգծում են Վրաստանում բռնաճնշումների աճող միտումը։ Պետությունները կարող են որոշակի սահմանափակումներ կիրառել բողոքի ցույցերի նկատմամբ հասարակական կարգը պահպանելու համար, սակայն նոր փոփոխությունները շատ ավելի խիստ են, քան թույլատրվում է մարդու իրավունքների միջազգային օրենսդրությամբ։ Խաղաղ հավաքները կարող են ժամանակավորապես խաթարել երթևեկությունը կամ անհարմարություններ առաջացնել. սա չի արդարացնում բռնությունները կամ ձերբակալությունները, որոնք չպետք է լինեն ոչ բռնի բողոքի ցույցերի ժամանակ։
Վրացական իշխանությունները, կարծես, վճռականորեն տրամադրված են լռեցնել խաղաղ ցուցարարներին սպառնալիքների և պատժի միջոցով։ Իշխանությունները պետք է ազատ արձակեն բոլոր նրանց, ովքեր ձերբակալվել են միայն խոսքի ազատության և խաղաղ հավաքների իրենց իրավունքներն իրականացնելու համար», — ասել է Amnesty International-ի Արևելյան Եվրոպայի և Կենտրոնական Ասիայի գծով փոխտնօրեն Դենիս Կրիվոշեևը։
