Ախալքալաքի մունիցիպալիտետի Սուլդա գյուղում շարունակվում է նոր դպրոցի շինարարությունը։ Այժմ ընթանում են առաջին հարկի պատերի, ինչպես նաև կաղապարամածի կառուցումը։
Շինարարությունը սկսվել է 2025 թվականի հունիսին, իսկ նախագծի ավարտը նախատեսված է 2026 թվականի հոկտեմբերին։
Նոր դպրոցը կառուցվում է Վրաստանի մունիցիպալ զարգացման հիմնադրամի կողմից, Համաշխարհային բանկի ֆինանսական աջակցությամբ։ Շենքը կլինի երկհարկանի, ընդհանուր մակերեսը լինելու է 2250 քառակուսի մետր։ Շինարարության արժեքը կազմում է 4 931 692 լարի։
Ներկայիս դրությամբ արդեն կառուցվել են հիմքը և առաջին հարկը։ Շինարարությանը մասնակցում են մի քանի խմբեր՝ տեղացիներ և այլ շրջաններից եկածներ։ Մի խումբն այժմ բլոկների միջոցով բաժանում է առաջին հարկի ներքին տարածքը, իսկ երկրորդը՝ զբաղում է կաղապարամածի աշխատանքներով։
Աշխատող Կորյուն Վարթիկյանի խոսքով, նրանք շինարարությունը կշարունակեն այնքան ժամանակ, քանի դեռ եղանակային պայմանները թույլ կտան։
«Մենք կաշխատենք մինչև ձյան գալը։ Տեսնենք կհասցնենք երկրորդ հարկի աշխատանքներն ավարտել և տարածքը բլոկներով բաժանել», — ասաց Վարթիկյանը։
Նոր հանրակրթական դպրոցի շենքը կհամապատասխանի ժամանակակից չափանիշներին և նախատեսված է մոտ 180 աշակերտի համար։ Հիշեցնենք, որ դպրոցի կառուցման մրցույթը շահել է ՍՊԸ «MC Group» -ը։
Պետք է նշել, որ գյուղը վաղուց նոր դպրոցի կարիք ուներ։
Ներկայումս Սուլդայի դպրոցը տեղակայված է երկու շենքում՝ մեկը նախկին գյուղխորհրդի շենքում, մյուսը՝ 1980 թվականին կառուցված նախկին մսի վերամշակման գործարանում: Դպրոցում չկա մարզադահլիճ և լաբորատորիա: Վերջին 20-25 տարիների ընթացքում կատարված մանր վերանորոգումներն էական բարելավումների չեն հանգեցրել:
Դպրոցում սովորում է մոտ 122 աշակերտ։
